Guddiga farsamada soo xulista baarlamaanka 2aad ee Hirshabelle ayaa ku xirey lacag in ay helaan kaarka aqoonsiga xildhibaanada baarlamaanka 2aad ee Hirshabelle.
Wararka ka imanaya magaalada Jowhar ayaa sheegaya in xildhibaan walba oo xalay lagu dhowaaqay in lagu xirey lacag gaareysa $500 “Shan Boqol oo dollar” in uu ku shubo akaawn uu furtay guddiga farsamada soo xulista baarlamaanka Hirshabelle.
Qaar ka mid ah xildhibaanada baarlamaanka labaad ayay ku noqotay layaab in lagu xiro lacag maadaama ay duubabkooda ay u gudbiyeen dhammaan waxyaalihii loogaga baahnaa.
Arrintan ayaa timid kadib markii saaka ay tageen xarunta guddiga farsamada xildhibaanadii lagu dhowaaqay loona sheegay inay bixiyaan lacagtaas.
Xildhibaanadii dib u soo laabtay ayaa sheegay inaysan hore u jirin lacago ay hore ugu bixiyeen inay qaataan aqoonsiga xildhibaanimada sanadkii 2016.
Liiska xildhibaanada baarlamaanka 2aad ee Hirshabelle ayaa xalay si degdeg ah loogu dhowaaqay iyadoo aysan joogin wakiilo ka socda dowlada federalka, illaa iyo haddana ma jirto wax war ah oo ay dowlada federalka ka soo saartay liiska xalay saqdii dhexe la shaaciyay.
Qaar ka mid ah beelaha dega Hirshabelle ayaa cabasho ka keenay liiska ay ku dhowaqeen guddiga farsamada soo xulista baarlamaanka labaad ee Hirshabelle.
Liiska la shaaciyay ayaa laga waayay guddoomiyihii hore ee baarlamaanka Hirshabelle Cismaan Barre Maxamed iyo ku xigeenkiisii Cabdi Xuseen Geeddi.
Diwaanka wararka
Warbaahinta Daljir
FAALLOOYIN & FALCELIN