Maxkamadda Ciidanka Qalabka sida oo xukun dil ah ku fulisay sedax dhagar qabe

Maxkamadda ciidamada qalabka sida ee Soomaaliya ayaa saakay xukuno dil ah ku fulisay saddex dhagar qabe oo lagu helay in ay fududeeyeen qaraxyo dad badan lagu dilay iyo weerarro kala duwan.

Fagaare iskool Buluusiya ayaa saakay lagu toogtay Maxamed Cabdulle Abkow Cumar (Biyamaalow), Shariif Maxamed Barqadle Ayaanle (Jeego) iyo sidoo kale Maxamed Cabdi Nuur Jiirow (Dhaqtar Fanax).

Biyamaalow iyo Jeego, ayaa ahaa laba sargaal oo horey uga tirsanaa ciidanka xoogga dalka, balse wada shaqeen la yeeshay maleeshiyaadka argagixisada Al Shabaab, iyaga oo gacana ka siiyay weerarro ka dhacay garoonka Aadan Cadde iyo goobo kale oo magaalada Muqdisho katirsan.

Raggan saakay la toogtay ayaa sidoo kale waxaa kamid ahaa dhaqtar Fanax oo ku shaqeyn jiray mihnadda Caafimadka, waxa uu sidoo kale iska dhigayay sargaal iyo shaqaale dowladeed.

Sedaxdan nin ee saakay la toogtay ayaa fududeeyay Qaraxyo iyo weerarro dad badan oo aan waxba galabsan noloshooda galaaftay.