Waxaa Jigjiga booqasho ku yimid Mas’uuliyiin uu soo diray Abiy Axmad, waxaana masuuliyiintaas kamid ah Maxamad Idriie, Wasiirka Arrimaha Gudaha (Minister of Peace), Ibraahim Tufa, Madaxweynaha Arrimaha Islaamka, Awal Arba, Madaxweynaha Deegaanka Canfarta, iyo mas’uuliyiin kale. Warbaahinta Itoobiya waxay sheegtay in ujeedka wafdigu uu yahay nabadaynta labada shacab ee walaalaha ah ee Canfarta iyo Soomaalida. Canfarta ayaa Soomaalida ka haysata deegaano ay kamidyihiin Garba-Ciise, Cadaytu iyo Cundhufo, kuna yaalla inta u dhaxaysa Hawaash iyo Mille.
Maamulka Deegaanka Soomaalida oo marti loo yahay ayaa afur lagu sheegay “Afurka Midnimada iyo Nabadda (Iftar for Unity & Peace)” ku maamuusay martida.
Waa maxay ujeedka martidan culus ee martida u ah Madaxweyne Cagjar?
Sida aan qormadeenii hore ee saaka ku faafinay, ujeedka wafdigu ma ahayn sida lagu sheegay ee waxa uu xidhiidh toos ah la leeyahay duullaanka ay Itoobiya u qorshaysay inay ku qaaddo Aratariya. Amarkii Abiye Axmad kabacdi ee uu amray in ciidanka iyo maamulada dalku u diyaargaroobaan dagaalka Aratariya ayaa odayaasha iyo maamulka Canfartu waxay Abiye ugu jawaabeen, “haddaan dagaalka galno, Deegaanka Soomaalida ayaa naga qabsanaya dhulka aan ka haysanno,” marka dagaalka ma gali karno.
Abiy oo aan dagaalka Arateriya gali karin la’aanta Canfarta waxa uu u sheegay in Soomaalidu aysan wax dagaal ah ku soo qaadi doonin, dhulkoodana aan laga qaadi doonin, sidaas ayuuna wafdiga ugu diray Jigjiga.
Dhanka Soomaalida, Abiye waxa uu maamulka Deegaanka Soomaalida ku wargaliyay in markii uu dhammaado dagaalka Aratariya lagu soo wareejinayo dhulka Canfartu ka haysato ee Galbeedka Sitti. Ma aha markii ugu horraysay oo uu Abiye maaweelinayo Dawladda Deegaanka oo saas oo kale ayuu waqtigii dagaalka Tigreega uga ballanqaaday Maamulka Deegaanka Soomaalida in dhulka loo so celin doono. Saas oo ay tahay markii uu dagaalka Tigreegu joogsaday Soomaalida wax dhul ah laguma soo wareejinin oo in ka badan 200,000 oo barakacayaal Soomaali ah oo ka barakacay Garbo-Ciise, Cadeyti iyo Cundhufo waxa ay weli barakacayaal ku yihiin meelo kaladuwan oo kamid ah Gobolka Sitti, qaarkoodna waxayba ka tallaabeen xadka deegaanka, waxayna ku suganyihiin Hargaysa, Jabuuti iyo meelo kale oo daafaha dunida ah.
Shantii Sano ee la soo dhaafay ayaa Maamulka Oromadu ku maaweelinayay maamulka Deegaanka Soomaalida in todobaad ama maalmo gudahood ay dadkaas ku noqonayaan guryahooda, mase dhicin oo waxaa diiday Maamulka Deegaanka Canfarta, waxaana garab ku siinaya madaxda Oromada iyo Axmaarada ee xukuma Itoobiya.
Ibraahim Tufa Madaxweynaha Arrimaha Islaamka oo hadda hoggaaminaya waftiga Jigjiga martida u ah waa Oromo gaar ahaan Caruuso, waana ninka u fatwooday Abiye Axmad inay Itoobiya xaq u leedahay inay hesho bad ay ayadu leedahay. Ibraahim Tufa ayaa badanaa Soomaalida loo soo diraa oo lagu maaweeliyaa marka uu Abiye qorshe cusub wato, walina lama fulin ballanqaad uu Tufa ula yimid Soomaalida.
Maamulka Deegaanka Soomaalida iyo waliba hoggaanka dhaqanku ma mooga huuhaada joogtada ah ee Ibraahim Tufa iyo madaxweynayaasha Oramada iyo Canfarta oo looga bartay “qabta maqashii waxna ha u qaban,” haddana u eg kuwo weli haya isla jidkii ay hore u hayeen, diyaarna u ah in ay fuliyaan hadba awaamiirta miiska loo soo saaro.
> Daljir Media | Wariyayaasha Daljir ee Jabuuti, Jigjiga iyo Garoowe
COMMENTS