GAROOWE MA AHA GOOF REER EE WAA CAASIMAD MUDATAY MAQAAMKAAS
Faallo kooban oo ku saabsan doodda Baarlamaanka Puntland
Inkasta oo Baarlamaanka Puntland looga fadhiyay inay xoogga saaraan arrimaha culus ee dalka ka taagan, sida; abaaraha, sicir-bararka, tahriibta, xagjirnimada, tacaddiyada ka dhanka ah haweenka iyo carruurta, iyo kobcinta dhaqaalaha. Haddana maadaama dood ku saabsan maqaamka Garoowe ay soo baxday, waxaa habboon in xaqiiqda la caddeeyo, ilayn; “Xaajo nimaan ogayn baa indhaha ka rida’e.”
Garoowe weligeed ma noqon deegaan kooban ama u xiran beel gaar ah. Waxaa dhisay oo wada degganaa bulshooyin ka kala yimid dhammaan gobollada Puntland iyo Soomaaliyaba: Nugaal, Bari, Mudug, Sanaag, Sool iyo xataa gobollo kale sida Gedo iyo Bakool.
Hal-doorkii Garoowe sida; Awad Amaanle, Waran-Bari, Aadan Rooble, Jaamac Cabdulle Gaabo, Maxamed Gacamey, Saciid Yuusuf Boqor, Yassiin Cali Faarax, Carab-duur, Gaas Muuse, Seed, Sheekh Abdisalaam Ciise, Macallin Xasan, Macallin Aadan, Guursade, Jalam, Afweyne Cali Dheere, Qalyare, Xorgoble, Cabdullahi Gacamey, Faarax Carkow, Lehelow, Cali Ugaar, Sareed iyo kuwo kale ayaa caddeyn u ah in Garoowe tahay ahaydna magaalo bulsho kala duwan leedahay.
Beelaha asalka ah (miyi iyo magaaloba) ee taariikh ahaa dhidibadana u taagay magaaladu waxay kala ahaayeen (Ciise Maxamuud, Reer-Cumar, Meheri, Cumar Maxamuud, Bah-Dhubays iyo Dhulbahante). Saddexdii bud-dhige ee ugu horeeyayna waxay kala ahaayeen Maxamuud Aw-Cismaan, Cabdulle Codweyn iyo Xaaji Sareed, waxay ka yimaadeen beelo kala duwan (Reer-Cumar, Cumar Maxamuud iyo Tumaal). Sidaas darteed, dacaayada iyo sheegashada ah in Garoowe “goof reer” tahay waa mid aan sal lahayn.
Maxay Garoowe u Noqotay Caasimadda Puntland?
In Garoowe caasimad loo dooro waxa dhaliyay sadarro cad oo aan muran lahayn:
1- Juquraafi ahaan: waxay ku taallaa bartamaha Puntland (iyo Soomaaliyba), masaafo isku dhowna u jirta gobollada oo dhan.
2- Amni ahaan: waxay ahayd mid ka mid ah magaalooyinka ugu nabdoon Soomaaliya muddo dheer.
3- Bulsho ahaan: waxay leedahay is-dhexgal, isu-tanaasul, iyo furfurnaan lagu yaqaan bulshada magaalada wada degan.
Isku darka nabad, juquraafi iyo bulsho isku dhafan ayaa Garoowe ka dhigay xarunta maamulka Puntland.
Garoowada Maanta: Magaalo Adeeg Casri ah Leh, Soomaalina kulan satay.
Garoowe waxaa ka jira:
-Biyo iyo koronto 24/7
-Amni joogto ah oo la isku halayn karo
-Garoon diyaaradeed oo caalami ah
-Adeegyo dowladeed oo dhammaystiran
-Iskuullo, jaamacado iyo xarumo caafimaad oo tayo leh
-Hoteello iyo adeegyo casri ah oo koraya
Waxaa aad u yar magaalooyinka Soomaaliyeed ee la jaan qaadi kara heerka adeeg iyo nidaamka Garoowe maanta ka jiro.
Maamulka Magaalada: Arrin Sharci ah, Doorasho furan
Garoowe waxaa maamula Gole Deegaan oo si xor ah loo doortay, muwaadin kasta oo Soomaaliyeed oo degana wuxuu xaq u leeyahay inuu u tartamo.
Doodda ku saabsan in maadaama Gobolku kulansado beelo fara badan, in xilalka muhiimka ah sida; Booliska, Garsoorka iyo hay’adaha kale lagu saleeyo matalaad bulsho oo aysan wada noqon hal beel, waa dood dhaxal-gal ah, waana mas’uuliyad Xukuumadda Puntland u taalla, iyadaana laga sugayaa inay hubiso isku dheelitirka iyo kalsoonida bulshada.
Garoowe iyo Muqdisho: Labo Xaaladood oo Kala Fog
Waxaa muhiim ah in la fahmo: “Garoowe Muqdisho maaha, Muqdishona Garoowe maaha.”
Doodaha baraha bulshada ee ku saabsan maqaamka Muqdisho lama xiriiraan xaaladda Garoowe, maxaa yeelay, labada magaalo waxay leeyihiin taariikh, amni, siyaasado iyo bulsho kala duwan oo aan la isbarbar dhigi karin.
Garoowe waa caasimad sharci ah, taariikhi ah, nabdoon, hooyana u noqotay dhamaan ummadda Soomaaliyeed, taaso ka tarjumaysa biseylka, kala-dambeynta iyo dowladnimada Puntland, mana aha deegaan u xiran cid gaar ah, xildhibaanka gobol kale ka yimidna Hotel amni iyo kalsooni daro awgeed uma degana, balse aqal uu ka dhistay ayuu nabad iyo xornimo ku degan yahay. Sidaa awgeed, Garoowe waa deegaan gacmo furan kusoo dhawaynaysa cid kasta oo nabad, nolol, ganacsi iyo deegaan la isku halayn karo u hamuuman.
WQ: Faarax Maxamuud Aw-Cismaan
COMMENTS
sta4xe