Madaxweyne ku-xigeenka Dawladda Puntland ahna kusimaha Madaxweynaha Eng. Cabdixakiim Cabdulaahi Xaaji Cumar Camey ayaa maanta 17-April-2016 ka qayb galay munaasabad lagu xusayey toddobaadka dhiraynta Puntland oo lagu qabtay xarunta cilmi baadhista iyo horumarinta Puntland ee PDRC.
Munaasabadda ayaa waxaa sidoo kale kasoo qayb galay Wasiirro, Xidlhibaano,Agaasimayaal, hay’adaha Wasaaradda Deegaanka kala shaqeeya ilaalinta deegaanka, arday, shaqsiyaad u ololeeya ilaalinta deegaanka iyo hawl-wadeenada Wasaaradda Deegaanka ee dawladda Puntland.
Munaasabadda toddobaadka dhiraynta Puntland ayaa sidoo kale waxaa lagu qabtaa sannad walba maanta oo kale dhammaan gobollada Puntland waxaana lagu soo bandhigaa sannad walba waxyaabaha laga qabtay badbaadinta deegaanka, faa’iidooyinka biyo xireenada la sameeyey, saamaynta is beddelka cimilada ee deegaanka iyo caqabadaha taagan.
Hobollada Mahuraan Band oo munaasabadda lagu casumey ayaa kusoo bandhigay goobta heeso wacyi-gelin ah oo aad u soo jiitey kasoo qayb galayaashii munaasabadda, heesahaas o ay ku cabbirayeen qiimaha ay leedahay dhirtu.
Madaxweyne ku-xigeenka dawladda Puntland ahna ku-simaha Madaxweynaha Eng. Cabdixakiim Cabdulaahi Xaaji Cumar Camey oo munaasabadda hadal ka jeediyey ayaa ka sheekeeyey faa’iidada deegaanku u leeyahay noolaha iyo sida ay lagama maarmaanka u tahay in meel looga soo wada jeesto sidii loo ilaalin lahaa deegaankeena.
Sidoo kale Madaxweyne ku-xigeenka dawladda Puntland ayaa ku boorriyey shacabka Puntland meelkasta oo ay joogaan in ay ka shaqeeyaan ilaalinta deegaanka iyo dhiraynta magaalooyinka iyo tuulooyinka si loo soo celiyo bilicdii magaalooyinka Puntland.
Kusimaha Madaxweynaha ayaa ku macneeyey sababaha keenay roob yaraanta iyo nabaad guurka ku dhacay deegaano badan oo ka tirsan Puntland ay sabab u tahay xaalufinta lagu hayo dhirta, taa beddelkeedana loo baahan yahay in loo midoobo sidii gacan bir ah laysagaga qaban lahaa kooxaha ku haywlan xaalufinta deegaanka.
Ugu dambayntii, Madaxweyne ku-xigeenka Dawladda Puntland ahna kusimaha Madaxweynaha Eng. Cabdixakiim Cabdulaahi Xaaji Cumar Camey ayaa sheegay in dawladda Puntland ay dhowaan samaysay ciidanka ilaalinta deegaanka oo ka hawl gala dhammaan gobollada Puntland, ciidankaas oo amar ku qaba in ay tallaabo sharciga waafaqsan ka qaadaan ciddii lagu arko iyadoo ka shaqaynaysa wax walba oo deegaanka wax u dhimaya.
—DHAMMAAD—
XAFIISKA WARFAAFINTA, WACYIGELINTA, HIDDAHA IYO DHAQANKA EE MADAXTOOYADA DAWLADDA PUNTLAND.
COMMENTS