Shirka Wadatashiga Dowladda Federaalka, Dowlad Goboleedyada iyo Gobolka Banaadir ayaa goordhow ka furmay magaalada Dhuusamareeb, iyadoo shirka uu ka dib dhacay waqtigii u qorsheeyay Madaxweyne Farmaajo oo ahaa 1-3 February.
Madaxda ka qeybgalaysa shirkan ayaa ku kala aragti duwan ajandaha shirka iyadoo hore shirar kala duwan laga soo saaray heshiis ay adkaatay fulintiisa.
Kulankan waxaa ka qeyb galay Ra’iisul Wasaaraha Xukuumadda Federaalka Soomaaliya Mudane Maxamed Xuseen Rooble, Madaxweynaha Dowlad-goboleedyada Galmudug, Axmed Cabdi Kaariye, Puntland Siciid Cabdullaahi Dani, Jubbaland Axmed Maxamed Islaam, Koonfur-galbeed Cabdicasiis Xasan Maxamed, Hirshabeelle Cali-Cabdullaahi Xuseen iyo Guddoomiyaha Gobolka Banaadir Cumar Maxamuud Maxamed.
War-Saxaafadeed kasoo baxay Villa Soomaaliya ayaa waxaa lagu sheegay in Madaxda ay isla gorfeeyeen dadaallada heer Federaal iyo heer dowlad-goboleed ee loo qaaday hirgelinta hannaanka doorashooyinka, xaqiijinta xasilloonida siyaasadeed iyo amni ee dalka.
Madaxweynaha Soomaaliya Maxamed Cabdullaahi Farmaajo ayaa tilmaamay muhiimadda ay leedahay wadajirka shacabka soomaaliyeed, waxa uuna dul istaagay marxaladihii adkaa ee laga soo maray dib u dhiska dowladnimadeenna.
Shirkan oo laga yaabo inuu socdo muddo saddex cisho ah ayaa laga yaabaa in dib u dhac ku yimaado ballantii Madaxweyne Farmaajo ee Baarlamaanka labada Aqal inuu khudbad u jeedin doono 5 bisha February oo ku beegan maalinta jimcaha.
COMMENTS