ASC Dhammaan dadka Soomaaliyeed, salaam kadib, waxaan jecelahay inaan xalkan idin kusoo gudbiyo warbixiin xaqiiq ah oo kooban taas oo ku saabsan Shakhsi ahaan Sheekh Mukhtaar Roobow Dabeecadiisa, Aqoontiisa iyo hab dhaqankiisa guud ahaan iyo goorta uu soo bilaawdey khilaafka ka dhaxeeyey asiga iyo Axmed Godane iyo weliba waxaa sabab u ahaa khilaafkaas inta aan ka ogahay hadii Eebe Edmo, sababta oo ah beriyahan danbe waxaa dhagaha shacabka Soomaaliyeed ku badatey war kusaabsan Sheekh Mukhtaar taas oo inta badan lagu baahinaayey saxaafada qeybaheeda kala duwan ayada oo qof walba qaab gaar ah uga hadlaayey, sidaas awgeeda, aniga warbixiinteyda waxay ku saabsantahay wax aniga iyo Sheekh na dhex marey iyo wax aniga aan goob jooge ka ahaa markii ay dhacayeen mana iga ah wax asiga aan ku difaacayo ama aan ku weerarayo midna, balse waa warbixiin dhab ah taas oo leh dad aad u farabadan markhaati ah kuwaas isugu dhex jiraa kuwo caalami ah iyo soomaali ah kuwaas oo intooda badan weli ay wada noolyihiin, sidaas awgeeda, warbixiinteyda waa sida tan soo socota; Waxay aheyd bishii Abriil 2006 markii iigu horeysey ee aan indhaheeyga ku arko Sheekh Mukhtaar Roobow Cali (Abuu Mansoor) asiga oo booqasho gaaban oo lama filaan ah ku yimid magaalada Baydhabo si uu kulan wada tashi ah ula qaato Hoggaamiyaashi Siyaasada ee ka tirsana Dowladii KMG aheyd ee AUN Madaxweyne C/laahi Yuusuf Ahmed taas oo fadhigeedu ahaa magaalada Baydhabo, gaar ahaan mas’uuliyiinta uga sar sareey ee kasoo jeeda qoomiyada DM kuwaas oo uga horeeyey hoggaamihii DM islamarkaasna ahaa Wasiirka Maaliyada AUN Col; Xasan Maxamed Nuur ( Shaati Gaduud), Shariif Xasan Sheekh Aadan oo xiligaas ahaa Gudoomiyaha Baarlamaanka iyo Maxamed Ibraahim Xaabsade oo ahaa Wasiirka Gaadiidka Cirka iyo Dhuulka, Sheekh Mukhtaar Roobow wakhtigaas wuxuu kamid ahaa madaxda sar sare ee Midoowgi Maxaakiimta Islaamka ee Mogadishu kasoo saartey Hoggaamiye Kooxeedkii Soomaaliya ee Xamar , kuwaas oo loo yaqaaney Isbaheysiga Ladagaalanka Argagaxiisada Soomaaliya, hase ahaate aniga ma xaqiijin karo waxay Sheekh Mukhtaar iyo labada masuul kale kawada hadleen waa Shariif Xasan iyo Xaabsade, balse waxaan goob jooge ka ahaa kulan gaaban Sheekh Mukhtaar la qaatey Shaati Gaduud, markaas oo u sheegey waxaa u yahay xadafkooda ka midoowga Maxaakiim ahaan inay rabaan dalkan Soomaaliya in lagu xukumo shareecada Islaamka guud ahaan taas oo dan weyn uga wda jirto guud ahaan ummada soomaaliyeed gaar ahaan DM sababta oo ah ku dhaqanka Shareecada Islaamka marnaba ma ogola in leys dulmiyo, intaas kadib, Shaati Gaduud ayaa inta u abaar ka aamusey oo dhoola cadeeyey ayuu Sheekha weydiyey hal su’aal oo gaaban “Ma waxaad aaminsantahay inaad sidaas yeeli kartaan oo inta aad dalkan oo dhan gacanta kuwada dhigtaan oo aad kusoo dabaashan ku dhaqanka Shareecada Islaamka”? Sheekha wuxuu ku jawaabey “ Haa waa hadii Alle SWT na waafijiyo” Shaati Gaduud ayaa yiri “ U maleen mayo taasi inay dhici doonto marnaba” Waayo Kooxdan aad hada isla jirtaan ujeedkooda ma ahan koox Diin Doon ah, balse waa koox Dowlad Diid ah wax wanaag ah oo ay dalkan iyo dadkan ay kusoo kordhiin doonan inaba lama arki doono, balse waxay dalkan iyo dadkiisa u horseedi doonan dhibaato kale oo hor leh taas oo aan u maleeynayo inay noqoto lama arag lama maqal, waayo waxaa keli ah laga filan karo ayaa ah inay dalka keenaan fakir Diimeed oo qaldan kaas oo laga soo minguuriyey wadamo shisheeye, waayo dadka arrimahan idinka hada wadaan hormuudka ka ah run ahaanti ma ahan dad arrinta sifican uga fakirey ama kawar haayo siyaasada caalamka meesha ay hada ku socoto, sidaas awgeeda, natiijada laga filan karo ayaa waxay tahay in xaalada dalka ay faraha kasii baxdo oo dhiig farabadan kale uu sii daato, waayo dalka waxaa ka jirto dowlad KMG ah oo beesha caalamku ay aqoonsantahay taas oo hadii idinka aad soo weerartaan la idinka difaac doono, balse idinkuna waxaad u maleeyseen in sidii Hoggaamiye Kooxeedkii Xamar oo kale barqo cad Baydhabo kula wareegi kartaan taas waa iska riyo.
Shaati Gaduud waxa kale oo intaas uga sii darey Sheekh Mukhtaar in hadii Koox Diimeed Qaldan oo isku heysata inay saxanyihiin ay sababi doonan dhibaato kale oo aan weligeeda la ilaawi doonin, sidaas awgeeda, adiga ka Sheekh Mukhtaar ahaan aniga hada kuma lehi dadkaas iskaga soo dhex tag , balse waxaan kugula talinayaa inaadan weliga wax dhibaato ah u geeysan qof muwaadin soomaaliyeed ah nooca doone ha ahaado hadii aadan wax u tari karin, waayo dadka aad maanta wada socotaan weliga iskuwada dan ma noqon doontaan ee warkeyga meel ku qoro, waayo waxaa laga yaaba inaad soo xasuusato maalin aan maanta aheyn hadii Alle Edmo, waayo aniga waxaan ahay qof rug cadaa siyaasi ah oo aad xog ogaal ah islamarkaasna qiyaasi karo wixii hada wadanka ka jira iyo meesha ay ku dhamaan doonan, sidaas awgeeda, qofna meeshaas haku qalqaalinin hadii Eebe Edmo waan arki doonaa meeshii ay ku dhammaato riwaayada beenta ah ee Xamar lagu soo abaabuley. Run ahaantii wajiga Roobow waxaa markaas laga dheexan karey inuu Tallada Shaati Gaduud usoo jeediyey qeyb kamid ah qaatey.
Bishii August 2008 ayaan markaleTuulada Dooraweer oo 80km dhinac waqooyi kaga begaan magaalada Baydhabo ku arkey Sheekh MUkhtaar Roobow oo ciidan faraban wato asiga oo wax gaadiid ah aan heysan marka laga reebo dhowr Dameer oo saxay ku watey, waa markii uga horeeysey asiga deegaanadan soo galo, sidaas awgeeda, aniga iyo dadka Tuulada joogey oo la yaaban ciidankan ayaa waxaa meeshi soo marey gaari Landcruiser ah oo u kireysan Hay’ada MSF kaas oo ay lasocodaan labo shaqaale ajaaniib ah kana yimid dhinac magaalada Hudur una socodey Tuulada Labaatan Jirow oo Hay’ada MSF ay ku lahed Xaruun Caafimaad, intaas kadib, aniga aad ayaan uga naxey in shaqaalaha Ajaaniibta ah la dhibaateyo , balse sidaas ma dhicin, waayo Sheekh Mukhtaar markuu arkey inay aad u argagaxeen labadii qof ajaaniibta ahaa oo kala ah qof dumar ah iyo qof rag ah ayuu u tagey wuxuuna ka codsadey inay marka hore is dejiyaan oo aan wax dhibaato ah jirin, intaas kadib, ayuu sifican ula Hadley oo niyada u dejiyey ayuu ku yirii “
Hadii aad tihiin reer MSF aad iyo aad ayaan idinkaga mahad celinayaa howsha ballaaran ee samafalka ah ee aad u heysaan bulshada soomaaliyeed guud ahaan , gaar ahaan tan aad kawadaan gobolkan Bokool oo ay uga horeyso mida caafimaadka, sababta oo ah aniga run ahaantii abaal gaar ah ayaad igu leedihiin ee aadbaan uga xumahay inaad iga argagaxdaan, waayo dadka isbitaalka magaalada Hudur aad kusoo daaweyseen waxaa kamid ah Xooyadey aniga I dhashey marka aniga oo intaas abaal ah idin xaayo inaad iga naxdaan ma aheyn, balse waxaan dareemaya inay jirto Maax Maax Soomaaliyeed ee aheyd (Dhurwaay iyo Caruur Xooyadooda ayaa isku dirty ee weligooda isma dagaalin) sidaas awgeeda, waxaan si xushmad leh idinkaga codsanaaya inaad dadka idinka danbeeyo u sheegtaan inaan aheyn sida Dhurwaa oo kale balse aan nahay bani’aadam oo idinka idin lamid ah welibana aad uga soo horjeedno in wax dhibaato ah la gaarsiyo shaqaalaha Hay’adaha Samafalka ee ka howl gala deegaanadan nooc kasta oo ay yihiin, sidaas darteeda, hadii aad hada u baahantihiin inaan idinku caawiyo ciidin ilaalo ah waa idinka hadii kalena wax dhibaato ah ma jiraan ee sidaas ula socoda ayuu ku yiri”. Intaas kadib, saraakiishi MSF aad ayey uga farxeen qaabka fican Roobow ula Hadley waxayna ku yirahdeen “ Sheekhow waad mahadsantahay ee maya wax ilaalo ah kaama rabno waayo kuweena ayaa nagu filan sido kale fariintaada dadka waan kaa gaarsin doonan gaar ahaan shaqaalada Hay’adaha samafalka qeybahooda kala duwan eek u shaqeeya goboladan Baay iyo Bokool”.
Intaas kadib, saraakiishi MSF makii ay Hudur dib uga laabteen waxay qoreen warbixiin ku saabsan wixii ay Roobow kula soo kulmeen markii ay Labaatan Jirow kormeerka u soo aadan, sidaas awgeeda, waxaa aad loo faafiyey sheekadii dhex martey Roobow iyo MSF, sidaas awgeeda, Hay’adihii kale samafalka dhammaantooda waxay go’aansadeen inay xiriir toos ah la sameeyaan Sheekh Mukhtaar Roobow kahor inta Alshabaab la wareegeen magaalada Baydhabo 26 Janaayo 2009, intaas waxaa dheer mudadii lagu gudi jirey wakhtigii kala guurka Sheekhu wuxuu kusoo wargeliyey dhammaan Hay’adaha Samafalka ee joogey labada Gobol Baay iyo Bokool inay shaqada duurka ah joojiyaan keli ah ay ku ekaadan xafiisyadooda ilaa inta ay toos magaalada ugala wareegayaan, waayo waxaa kale jirey Jabhado kale oo aan Shabaabka kamid aheyn kuwaas oo ayagana kawada howl gali jirey qeybo kamid ah goboladan waxayna kala ahaayen Midoowga Maxaakiimta garabkii Indha Cade iyo koox kale oo la oran jirey Jabhatul Islaami oo saldhigooda ahaa degaanka Daynuunay duleedka magaalada Baydhabo, sababta oo ah Sheekhu wuxuu ka cabsi qabey in shaqaalaha samafalka dhibaato ay kusoo gaarto kala guurkan dhexdiisa.
Intaas waxaa dheer 20 Janaayo 2009 ayuu shir jaraa’iid qabtey asiga oo jooga magaalada Mogadishu wuxuuna shirkiisa jaraa’id toos ula soo hadley dhammaan dadka ku nool magaalada Baydhabo inay cafis u fadiyeen dhamaantooda hadii ay yihiin shacab ama siyaasiin iyo askar oo aan jiri doonin qof wax loo heysto nooc kasta uu yahay, run ahaatii ballantii uu dadka ka qaadey 95/ wuu fuliyey, waayo wuxuu magaalada uga dhex yimid Wasiiro, Xildhibaano, Saraakiil Ciidan oo kala duwan kuwaas oo qaarkooda dhaawacyo daran qabey ayaga oo markaas dhow kusoo dhaawacmey dagaalo duleedka magaalada Baydhabo ku dhex marey ayaga iyo Alshabaab, ayada oo weliba isla maalintaas magaalada baydhabo dhexdeeda dagaal adag ku dhex marey qaar katirsan ciidamda dowlada iyo qaar katirsan ciidanka Alshabaab kuwaas oo u hoggaaminaayey taliyaha ciidanka Jabhada Alshabaab Baay iyo Bokool oo lagu magacaabo Macalin Jinaaw kaas oo magaalada kasoo galey dhinac koonfor kahor inta aan Roobow magaalada soo gaarin asiga oo Roobow kayimid dhinac Mogadishu, dagaalkaas wuxuu sababey khasaare naf iyo maal leh, sababta oo ah dhinac dowlada gaari tikniko ah ayaa laga gubey ayada oo dhinac Alshaabna laga diley ilaa 5 qof ah, mar allaale markii Roobow soo galey magaalada wuxuu amar ku siyey ciidinkiisa inay xabada joojiyaan oo ay dib u baxaan wadadana ay furan, intaas kadib Roobow wuxuu gurigiisa uga tagey Xil Maxamed Ibraahim Xaabsade oo ay la joogan dhowr xildhibaan asiga weliba Xaabsade heysta gaari Tikniko oo Dhashiike ah oo asiga iska leeyahay markaas ayuu intuu soo kaxeeyey oo wadadana usoo furey ayuu dadkiisa soo gaarsiyey markaas ayuu Roobow kaftan ahaan uga yiri ‘ Xaabsade gaariga Dhashiika ah ee reeb” markaas ayaa Xaabsade intuu ku qosley ku yiri ‘ Ee waa kaas ee qaado keli ah lafaheena noo daa’. Sidaas ayey ciyaarta kusoo dhammaantey, 20 maalimood kadib, Roobow wuxuu isugu yeerey dhammaan Golaha Odoyaasha Dhaqanka, Ururada Bulshada Rayidka, Golaha Aqoonyahaniinta iyo qaar katirsan shaqaalaha Hay’adaha Samafalka wuxuuna ku wargeliyey inuu dhowr qof usoo magacaabey maamuulka labada gobol Baay iyo Bokool si KMG ah kuwaas oo asiga uu aad uga kalsoonyahay ee wuxuuna dadka dhammaantooda ka codsadey in maamulkaas lala shageeyo, sido kale wuxuu ku dhawaaqey in hay’adaha samafalka dhammaantooda fasaxanyihiin oo shaqadooda sii wadan karaan asiguna xaaladooda markasta dusha kala socon doona.
Bilaawgii khilaafka Godane iyo Roobow.
Inta badan dadka aad uguma war qabaan wakhtiga uu soo bilaawdey khilaafka Roobow iyo Godane, balse wuxuu soo bilaawdey wakhtigii Roobow uu ku dhex mashquulsanaa arrimaha Gobalada Baay iyo Bokool markaas gacantooda soo galey ayaa Godane wuxuu diyaarsadey Isbaheysi cusub oo Roobow mucaarad ku noqoda, kuwaas oo u badan Golaha Shuurada waxay kasoo kala jeeden seddax beelood oo Xawiye ah waa ninanka loo yaqaano milkiiliyaasha Alshabaab sababta oo ah waxay gacanta ku haayan inta badan baabuurta dagaalka, Saanada, Sirdoonka, Siyaasada, Garsoorka,
- Xuseen Cali Fiidow b) Cali Dheere oo beesha Murunsade ah, Daahir Gacmey oo beesha Duduble ah, iyo Mahad Karataay oo beesha Habargidir Ceyr ah. Sido kale waxaa jirta koox kale oo kasoo jeeda beesha Dir kuwaas oo loo yaqaaney Maamuliyaasha, Maaliyada iyo Maskaxda Alshabaab, sababta oo ah waxay aad uga takhasuseen qaabka loo dhex galo beelaha aan isku kalsooneyn, kuwa laga tirada badanyahay, Xabka loo faafiyo beenta la rabo in loo ekeeysiyo runta iyo qaabka dab looga dhex shido qabiilada ka dhaxeeyso hurguf soo jireen ah, waayo kuwan Dirta ah dhammaantooda waxay ahaayeen dad ku dhex nool meel aan aheyn deegaanadii ay asal ahaan kusoo jeeden, sidaas awgeeda waxay go’aansadey inay hoggaamiyaan oo xukumaan dad ayaga aan wax dano ah ka gelin hadii gebigooda hal maalin la wada dhammeeyo, waxayna kala Axmed Godane, Ibraahim Afgaan, Macalin Burhaan iyo Mahad Cabdikariin, intaas waxaa usii dheera ninka loo yaqaano cod baahiyaha colaada waa Fu’aad Shonqole, 9 qof waxay isku raaceen in Roobow danahooda gaarka ah uu aad qatar uga yahay maadaama Roobow dhinac ciidanka Alshabaab iyo bulshada dhexdeeda samcad fican ku leeyahay, mar hadii gobolada Baay iyo Bokool gacanta Alshabaa ku jiraan, sidaas awgeeda, kooxda Godane waxay go’aan ku gaaren in sifican loo dhiso kooxda Amniyaadka, kuwaas oo Roobow aad uga soo horjeedey in la dhiso, sababta oo ah Roobow wuxuu magaalada Baydhabo u diidey kooxda Amniyaadka inay ku shaqeeyaan gebi ahaan, kadib markii ay magaalada dhexdeeda kusoo afduubeen labo sarkaal oo katirsanaa ciidanka nabadsugida qaranka soomaaliya oo uu ka mid yahay taliyihii qeybta nabadsugida gobolka Baay G/lle Sare Maxamed Cabdiraxmaan kuwaas oo kamid ahaa dadkii cafiska Roobow fadiyey dartiisa magaalada uga sii nagaadey, inkasta oo dhowr sacadood kadib labada sarkaal xoriyadooda dib u heley waayo Roobow ayaa ku hanjabey inay wax kale dhici doonan hadii si deg deg ah aan lagu keenin dadkaas cid allaale cidii afduubkaas ka danbeeyseyna ay wada xisaabtimi doonan qof kasta uu yahay.
Godane iyo kooxdis waxay ku heshiyeen in marka hore Alshabaabka dhexdiisa lagu faafiyo warar been abuur ah oo looga danleeyahay in Roobow sumcadiisa lagu baabi’iyo ayada oo la adeegsanaayo Fu’aad Shongole Fatwo soo saarey oo leh qaabka Roobow u maareyey qabashada Baydhabo qalad weyn ayuu ku galey.
Intaas waxaa sii dheered barbaqaando kale oo lagu dhaadhicinaayo qaar kamid ah saraakiisha Alshabaab gaar ahaan kuwa kasoo jeeda DM ayada oo loo sheegayo in Roobow heshiisiyo gaar ah lasoo galey dhammaan Haya’daha samafalka ku shaqeeya Baay iyo Bokool ee idinka oo dhan ka DM ahaan ma iska warheysaan mise waa heshiis asiga u gaar ah, nasiib daro Godane iyo kooxdis isku deygaas waay ku guul dareesteen, waayo Roobow ayaa gaashanka u daruurey wuxuuna u sheegey in 9 qof dhammaantooda uu asiga kaga aqoon sareeyo dhinaca Diinta Islaamka iyo tan istiraatiijiyada ciidan, sidaas awgeeda, Roobow wuxuu yiri hadii aad weli dood kale qabtaan waxaa noo Fatwoon karaa keli ah Culmada Islaamka waa weyn ee aniga idinka waxba iima sheegi kartaan, waayo waxaad leedihiin Xil: Cismaan Caato waa Muslim ee waa lasii deeynayaa sido kale xil:
Maxamed Ibraahim Xaabsade waa Murtad ee maxaa loo qaban waayey, si kastaba ha ahaate, 9 qof waxay sheegen inay weli ku kalsoonyihiin in lagu kala baxo Fatwo Diini ah weliba arrinta loo bandhigo qof ay magaciisa ku sheeqeen Sheekh Xasaan kaas oo ay ku tilmaan inuu yahay qof aqoon durugsan u leh Diinta Islaamka, sidaas awgeeda, markii loo bandhigey sheekadii Sheekh Xasaan wuxuu soo saarey go’aan uu kusoo ayidey Roobow inuu ka saxanyahay ee ayaga ay yihiin kuwa qaldanarr.
Intaas kadib, Roobow wuxuu dib uga soo laabtey magaalada Baydhabo hotel Wagera ayuu saxaafada kula Hadley asiga oo ay weheliyaan Golaha Odayaasha Dhaqanka, Aqoonyahaniinta, Ganacsatada iyo Ururada Bulshada Rayid ah wuxuuna xalkaas ku sheegey inuu furanyahay garoonka diyaaraha magaalada Baydhabo, sido kale wuxuu hay’adaha samafalka ka codsadey inay shaqadooda iska wataan ayna isticmaali karaan garoonka wixii sacadaas ka danbeeyo, maalintii labaad waxaa garoonka kusoo digtey labo diyaaro UN ah oo ay lasocodaan shaqaalle ajaaniib ah ayada oo Roobow garoonka joogey ciidinkiisa gaarka ah ayaana sugaayey amaanka garoonka guud ahaan weliba waxaa lasocodey wariyaal katirsan TV Aljazzeera.
Inta aan ogahay Roobow wuxuu Alshabaab kasoo daayey shaqaale Ajaaniib ah oo u shaqeeynayey hay’adaha samafalka sida UNDP/WFP and MSF, kuwaas oo qaar kamid ah Alshabaab kusoo afduubey degmada Waajid gobolka Bokool iyo xalka kuwa kale laga soo afduubey degmada Hudur isla gobolka Bokool.
Sido kale Roobow wuxuu in la afduubo ka badbaadiyey shaqaalle kale ajaaniib ah oo ku sugnaa magaalada Baydhabo, kuwaas Alshaab ay rabeen inay afduubtaan, kuwaas oo kala shaqeeynayey hay’adaha kala ah: UNOCHA/UNDSS/UNICEF/UNFPA and UNMAS waxay si nabad ah diyaarad uga raaceen garoonka magaalada Baydhabo, intaas wixii ka danbeeyey, Alshabaab, waxay dib u bilaabeen inay faafiyaan dacaayad raqiis ah sida Sheekh Mukhtaar UN wax yaabo lamid ah, ayada oo weliba Alshabaab maamul kale cusub usoo magacaabeen gobolada Baay iyo Bokool, maamulkaas waxaa hormuud ka ahaa ninka hada Alshabaabka Amiirka guud u ah Abuu Cubeyda ama Mahad Cabdikariin.
Dabeecada Roobow inta aan ka aqaano Sheekh Mukhtaar Roobow waxaan ku tilmaami karaa qof aad u degan oo xushmad badan, aadna uga naxriista dadka sido sifican u dhageesta dadka markii ay wax u sheegayaan, aad uga fican dhinac ballanta, sido kale waa qof gacan furan oo deeqsi ah inta badan ma jecel inuu dadka wax weydiisto, balse wuxuu ka jecelyahay inuu asiga wax siyo dadka, waa qof ma daale ah oo aad howl kar u ah aadna u jecel waxbarashada, sababta oo ah weligey ma arkin Roobow oo aan gacanta ku heysan kutub Diini ah hadii uu heysto wax yar oo fursad ah wuxuu akhriista kutubkis.
Dhinac Aqoonta
Sheekhu wuxuu aad iyo aad uga dhisanyahay dhinac Diinta Islaamka welina wuxuu aad u jecelyahay inuu sii barto.
Saameen intee la eg ayuu dhex leeyahay Alshabaab,
Sheekh Mukhtaar Alshabaab dhexdiisa wuxuu ku leeyahay saameen aad u weyn taas oo xitaa aan hada ku laheyn ninka Amiirkooda ah, waayo 7 jeer oo hore ayuu Amiirka Alshaabka Amrey in la weeraro Roobow, balse marwalbo askarta ayaa diid jirtey amarkaas, mida kale Alshabaab ciidinkooda 75/ cabsi darteeda ayey uga mid yihiin mida kale qofba qofka kale ma aaminaayo ee shaki ayuu ku qabaa waa qaabka ay u dhisanyihiin, sidaas awgeeda, hadii ay helaan meel ay kusoo haggaagan kuwo farabadan oo aniga aan ogahay ayaa deg deg ku imaanayo.
Baaq kusocoda madaxda sar sare dowlada federaalka soomaali
Marka hore aniga Sheekh Mukhtaar Roobow isku Qabiil ma nihin isku deegaan xitaa ma ahin, balse waxaa na dhex martey wada shaqeen oo labo qofood isku baran karaan, sidaas awgeeda, waxaan xalkan baaq uga diraaya madaxda sar sare dowlada soomaaliya oo uga horeeyo madaxweynaha Maxamed Cabdullaahi Maxamed Farmaajo, waxaan leeyahay mudane madaxweyne hadii aad rabtaan inaad fulisaan ballantii shaley aad ka qaadeen shacabka soomaaliyeed inaad Alshabaab meel kasaari doontaan ama aad ka horeeyneysaan dalka oo dhan run ahaanti waxaa Alle SWT idin sahley qofkii aad arrintaas la kaashan laheydeen ee ha iska dayiciin.
Wabilaahi Towfiiq
Waxaa diyaarey: Maxamuud Maxamed Ibraahim Email:
COMMENTS