Laga soo bilaabo 25-kii bishii Agoosto ee aan soo dhaafnay oo Somaliland ciidamadeeda laga xoreeyey dhammaan degaanka Sool, waxaa magaalada Laascaanood ka hanaqaaday isbaddel weyn. Magaalada waxaa dib ugu soo noqday in ka badan 70% dadkii deganaa, sida uu sheegay Maxamuud Jaamac Maxamed Guddoomiyaha xaafadda Sayidka, taas oo ka dhigaysa mid ay dadku si xawli leh ugu soo noqonayaan magaalada, marka laga reebo kuwo waayey meel ay ku soo nodaan oo guryahoodii ay baabi’iyeen madaafiicdii Somaliland ku garaaceysay magaalada.
Magaalada oo la filayey in ay qaadan doonto muddo dheer si ay uga soo kabato dhibkii gaadhey ayaa haatan xaalku u muuqdaa mid ka duwan sidii la filayey. Haddaba aan eegno isbaddalka xawliga ku socda ee hormarka wata ee ay magaalada Laascaanood ku tallaabsatay tan iyo 25-kii Agoosto 2023.
AMMAANKA
Isla markii dagaalku dhammaaday waxaa si lamafilaan ah magaalada ugu soo noqday dadkii horey uga barakacay iyadoo maamulka SSC ay ka digayaan qasaaraha ay keeni karaan haraadiga waxyaabaha qarxa. Khasaare waa dhacay, waxa uuna keenay dhimashada 3 carruur ah iyo dhaawaca 5 kale. Laakiin khasaarahaas wax saameyn ah kuma uu yeelan qulqulkii dadweynaha iyo soonoqoshadoodiiba.
Dhinaca kale waxaa gacanta dhalinyarada galay hubka noocyadiisa kaladuwan, waxaana ay magaaladu u muuqatay mid ammaankeedu uu khatar ku jiro, waxaana dhegaha dadka markasta ku soo dhacayey dhawaaqa rasaasta.
“Rasaasta habeen kasta dhaceysaa dhib ayey igu haysaa, carruurtii ayaa sas ka qabta, oo in aan hadda magaalada ka kexeeyo ayey qasab igu tahay,” sidaa waxa yidhi Deeqa Xasan oo kamid ah dadkii qoysaskoodu ku soo noqdeen magaalada Laascaanood.
Si maamulku uga hortago dhibka ay shacabku tirsanayaan, laga soo bilaabo 22-kii bishan waxaa la sameeyey ciidan loogu magacdaray Ciidanka Xasilinta oo isbaddel weyn ku sameeyey ammaankii magaalada, waxaana meesha ka baxay hubkii xarragada magaalada loogu wadan jiray. Waxaa kale oo isna yaraaday maandooriyaha iyo khamriga oo caqabad culus ku ahaa ammaanka.
GANACSIGA & BILICDA MAGAALADA
Si degdeg ah oo lamafilaan ah ayaa ganacsigii magaalada dib ugu soo laabtay, waxaana la furay dhammaan ganacsigii waaweynaa ee waddooyinka muhiimka ah saarnaa. Xaflado dhawr ah ayaa todobaad kasta lagu qabtaa magaalada, taas oo dib loogu furayo goobaha ganacsiga, sida hoteelada heerka koowaad, warshadaha, iyo shirkado kaladuwan, oo dhammaantood xidhnaa muddadii siddeeda bilood gaadhaysay ee dagaalku ka socday gobolka Sool.
Kirada guryaha ayaa aad kor ugu kacday kaddib markii qoysas muddo 15 sano ka badan ka maqnaa magaalada ay dib ugu soo noqdeen, halka guryaha magaaladu in ka badan 25% ay dunsanyihiin ama u baahanyihiin dayactir xoog leh, sida ay Daljir u sheegeen dhallinyaro iskood isugu xilqaamay qiimaynta dhibaatada soo gaadhey magaalada Laascaanood.
Dhanka suuqyada magaalada waxaa aad looga dareemayaa ganacsato ka imaanaya dhinaca Puntland oo furtay goobo ganacsi, waxaadna arkaysaa boodhadh cusub oo lagu dhejiyey magaalada.
Ganacsade Cabdiqaadir Cabdi Maxamed oo aan la kulanay ayaa noo sheegay in uu magaalada Laascaanood joogo laba todobaad si uu u helo goob ganacsi, balse uusan weli helin.
Waxaa kale oo magaalada ku soo qulqulaya qurbajoog daafaha dunida ka imaanaya, kuwaas oo isugu jira kuwo eegaya xaalku siduu yahay iyo qaar ayaguna maalgashi in ay magaalada ka sameeyaan u soo ambaqaatay.
WAXBARASHADA
Inta badan goobaha waxbarashada ayaa la furay, iyadoo Sabtidii aan soo dhaafnay ay dhammaan Dugsiyada Hoose, Dhexe iyo Sare albaabada loo furay. Waxbarashada Jaamacadaha ayaa la sheegay in bisha soo socota kowdeeda duruustu bilaabanayso haddana diiwaangelintu socoto.
Daahir Maxamed Axmed, Guddoomiyaha Waxbarashada gobolka Sool, oo aan kula kulanay xaruntiisa ayaa waxa uu sheegay in 33 iskuul oo Hoose/Dhexe ah iyo 8 Sare la furay; halka waxbarashada jaamacaduhu ay haatan yihiin 7 Jaamacadood.
Guud ahaan goobaha waxbarshada ayaa intooda badani ay qabaan dhaawacyo ka soo gaadhey burburkii dagaalkii 8-da bilood ka socdey magaalada, balse waxaa haatan socda dib-u-dhis ballaaran.
Dhanka miinooyinka, in kasta oo ay magaalada soo gaadhay hay’adda miinada la tacaasha ee The Hallo Trust ayaa haddana inta badan goobaha waxbarashada oo xarun u ahaa ciidamada degaanka looga cabsi qabaa in carruurtu ay dhibaato kala kulmaan wixii hadhaadi qarax ee weli dhulka ku duugan.
BIYAHA OO AAN WELI XAL LOO HELIN
Magaalada oo awal biyaha sifaysan ka heli jirtay Shirkada Biyaha Nugaal ayaa iyadu kal hore khadka ka baxday, waxayna sheegeen mulkiilayaasha shirkaddu in gebi ahaanba la burburiyey agabkii shirkadda, wixii kalena ay qaateen ciidamadii Somaliland, sidaas waxaa Daljir u sheegay Maamulaha shirkadda Cabdirisaaq Cismaan Oogle.
Kaalintii Shirkadda Biyaha ayaan illaa iyo haatan aysan jirin cid buuxisay amaba buuxin karta kaalintooda, waxaana hadda booskoodii galay booyadaha biyaha dhaamiya, biyahaas oo laga keeno goobo ka baxsan magaalada, iyo qaar kale oo biyo adag oo aan la cabbi karin ka soo dhaamiya durdurka Laascaanood.
Warshadda Biyaha iyo shirkad kale oo biyaha sifaysan samayn jirtey ayaa waxa ay ku wada yaaleen duleedka Goojacadde oo fadhiisin u ahaan jirtay ciidamada Somaliland.
Saas oo xaalka biyuhu yahay, waxaa haatan si buuxda u soo kabanaya magaalo siddeed bilood madaafiic lagu garaacayey, waxaana la filayaa in muddo kooban ay Laascaanood ku soo kaban doonto.
Diiwaanka wararka | Daljir Laascaanood
COMMENTS