MADAXWEYNAHA BURKINA FASO OO U JAWAABAY MAREYKANKA & FARANSIISKA
Sidii aan hore u soo warinay, madaxweynaha Burkina Faso Ibraahim Troare ayaa 16kii Abriil waxa uu ka badbaaday isku day la rabay in lagu dilo, dalkana looga abuuro qalalaase lamid ah kii hore looga abuuray Soomaaliya, kaas oo ahaa in dadka la isku diro, lagana ilaaliyo intii waqti ah in ay yeeshaan madaxweyne talada kala wareega Troare. Jaraa’idada Faransiiska ayaa qoray in la qorsheeyey in markii dalku galo xaalad adag Burkina Faso la geeyo ciidamo nabad-ilaalin oo ka socda Qaramada Midoobay. Xataa waxaa la cayimay in ciidamada nabad-ilaalintu joogaan ilaa 30 sano.
Maalmo kabacdi markii uu dhicisoobay qalalaase abuurkii lala damacsanaa Burkina Faso, waxaa barlamaanka Mareykanka warbixin siiyey Jananka haysta Hawlgalka Mareykanka ee Afrika ama Africom Michael Langley. Jananka ayaa barlamaanka Mareykanka u sheegay in Madaxweynaha Burkina Faso uu caburiyo dadkiisa oo dalka aysan ka jirin wax xorriyad ahi, uuna la wareegay dahabkii dalka, asaga oo dahabka ku naasnuujiya inta ka agdhow.
Madaxweyne Ibraahim Traore oo ah Madaxweyne Afrika oo dhan laga amaanay, dadkiisuna aad u jecelyihiin, siiba dadka galbeedka Afrika, ayaa ka xanaaqay hadalka Jananka madow ee Mareykanka, kuna tilmaamay dhagar lamid ah tii Qadaafi loo qooshay.
Ibraahim Traore oo khudbad shalay u jeediyey dadkiisa xaflad lagu maamuusayo ciidamo cusub ayaa si dadban ugu jawaabay Mareykanka waxa uuna yiri:
“Wadankayagu wuxuu soo maray marxalado adag oo dhib badan. Dhallintiina halkan fadhida oo aan anigu ku jiro waxaan ku dhalanay nidaamkaas dhibka badan. Mana aha nidaam oggol in aan sameyno haba yaraatee wax hormar ah. Annagu marka maanta waa in aan laba kala doorano. In aan la dagaalano nidaamka saas na yeelay, ama in aan noqono adoomo la leeyahay.
Saan hore idiin ku sheegay waxaa jira kuwo maskaxdooda la galiyey in ay yihiin adoomo, waxa kaliya oo laga rabaana ay yihiin in ay u shaqeeyaan kan iska leh ee mastarkooda ah, oo asaga kaliya ay daacad u ahaadaan. Kuwaas waa kuwa maalin kasta raba in ay been idin ka dhaadhiciyaan oo maskaxdiina ku ciyaaraan. Tashada oo wada tashada si aad isaga dhicisaan cadowga dhagarta idiin qooshaya. Ha dhegaysanina quraafaadka ay idiin sheegayaa kuwa maskaxda laga gumeystay oo ay warbaahinta la hor imaanayaan. Idinkaa la idin ka rabaa in aad noqotaan waddaniyiin oo aad waddankiina difaacdaan. Kuwa annaga noo hanjabaya halkan baan kula dagaalami doonnaa.
Waa in aad ogaataan kuwa la baxa NGO ama sheegta in ay yihiin hay’ado aan dawli ahayn, ay yihiin kuwo dawlado soo dirsadeen oo lacagta siiyaan. Waa hayado shaqadoodu tahay beenabuur iyo in ay niyadda idin ka jabiyaan oo idin baqdin galiyaan, si aydan u dagaalamin oo aydan uga dhiidhiyin dhagarta la idiin qooshayo.
Tusaale waxaa idiin ku filan Liibiya. Yaa burburiyey Liibiya? Waa isla hay’adahaas oo waxay abuureen warbixino wada beenabuur ah si bulshada loo kiciyo oo looga horkeeno dawladooda. Qadaafi waa galaafteen, dabadeedna waxay u soo wareegeen gobolkeena Saaxilka. Waa la dagaalamaynaa waana dacweyneynaa hay’addaan beerabuurka meel kasta la taagan. Ma aha kuwo cashar annaga noo dhigi kara oo maba laha dub naxa. Bal arag waxa maanta adduunka ka socda. May aadaan meelaha dhibku ka jiro oo difaacaan dadka difaaca u baahan inta ay beentooda annaga nala soo aadayaan. Xuquuqda aadanaha ay sheegayaan waxba kama jiraan oo waxayba noo arkaan kuwo bini aadamka ka hooseeya oo aan nolol istaahilin. Waxay noo arkaan adoomo la yeelan karo. Waa sida ay la tahay. Laakiin waa mid annaga noo taal in aan tusno in aynaan ahayn adoomo ay yeelan karaan. Marka ha ka yeelina beenta ay la wareegayaan oo dantiina iyo dalkiina ka ilaashada.
Adduunku wuxuu soo maray dagaalo, dagaalkii labaad ee adduunkana kuwii is difaaci waayey ee inta noo yimaadeen dadkayagii askareeyey si aan u difaacno oo dabadeedna aan Naadsiga ka xoreynay, dalkaas baa maanta inta noo yimaado wuxuu rabaa in uu annaga cashar noo dhigo. Waxaad ka soo jeeddaan dadkii adduunka Naadsiga ka xoreeyey, maantana dalkiina ayaad u dagaalameysaan, kuwii aad shalay xoreeyseena maanta aflagaado bay idin la dul taaganyihiin. Yeeli mayno! Difaacda dalkiina, oo ka yeeli mayno inta noo yimaadaan in ay inta tuulooyin dhan baabi’iyaan ay macdan ka qotaan. Waan ka dagaalamaynaa taas, dalkayagana waa difaacaynaa. Macdanta annagaa iska leh. Annaga iyo jiilalka soo socda baa ka faa’iideyna, meeshii ay cid kale ka faa’iidi lahayd.
Aan mar kale idin xasuusiyo, dagaalka aan maanta ku jirnaa waa kii aan ku xoroobi lahayn oo aan ku diidayno in aan adoomo dad kale sii ahaano. Qalbiga farxad u sheega oo dhiiranaada. Dad bannaanka nooga yimid yeynaan yeelin beentooda, maxaa yeelay waxa ay u danleeyihiin waa in ay na adoonsdaan oo naga dhigaan kuwo aan waxba ahayn. Dagaal baan ka xignaa oo aan hore u socono. Dhaqankiina ku adkaysta oo xasuus gooni ah u yeesha meel kasta oo aad ka timaadeen. Difaaca dalkiina oo karti ku naalooda.”
Intaas waxaa ku eg khudbaddii Madaxweyne Ibraahim Traore.
Dhanka Soomaaliya, Soomaalidu maxay ka baran kartaa Burkina Faso iyo Madaxweyne Ibraahim Traore, mise waxay Soomaali sii wadi doonaan in ay dhegta u raariciyaan kan dilaya, dhacaya, isku diraya, dalkana kala wareegaya, oo macdantooda iyo batroolkooda u socda in uu dalkiisa ku dhiso adna aad ka gaajooto?
> Daljir Media
COMMENTS