Dowladda Mareykanka ayaa war kas oo soo saartay hawlgal ciidamada milatariga ay ka fuliyeen magaalada Gaalkacyo, xaafadda Wadajir (Baraxley), laguna soo qabtay xubin AlShabaab u qaabilsana sameynta qaraxyada iyo fulinta hawlgalada.
Afhayeen u hadashay ciidamada Milatariga Maraykanka ee Afrika ee (Africom) ayaa sheegtay in Cabdirizak Tahliil oo ku eedeysan in uu ka caawinayey Alshabaab sameynta waxyaalaha qarxa ay soo qabteen ciidamada Difaaca Maamulka Puntland ee loo yaqaan PSF.
Qoraal lagu daabacay AP iyo NY Times ayaa afhayeen Jennifer Dyrcz ku sheegtay in milatariga Maraykanka ee Africom ay ciidamada PSF ee Maamulka Puntland ka caawiyeen qabashada Cabdirisaaq Tahliil ina Caloolgeel (Ilkacase). Afhayeenka ayaa xaqiijiyey in Ilkacase/Ina Caloolgeel uu dhowr jeer u safray Maraykanka, uuna haysto deganaanshaha dalka USA.
Cabdirisaaq Tahliil ayaa subaxnimadii Axada, 23 Luulyo, lagu soo qabtay hawlgal PSF Gaalkacyo oo gacan ka helaya ciidamada Maraykanka. Afhayeen Dyrcz ayaa xaqiijisay in Cabdirisaaq Tahliil loo yaqaan Ina Caloolgeel ama Ilkacase uu haysto deganaanshaha Maraykanka, uuna ku noolaa oo deganaa dalka Maraykanka intii u dhexeysay sanadihii 2006 iyo 2009.
Cabdirisaaq Tahliil (Ina Caloolgeel/Ilkacase) ayaa Dawladda Puntland ugu eedaysnaa in uu masuul ka yahay dilal 25 kor u dhaafay oo laga fuliyey magaalada Gaalkacyo, lalana beedsagay haldoorka bulshada iyo huggaanka dowladda. Wuxuu kale oo ku eedaysnaa samaynta qaraxyada lala beegsado Puntland iyo kuwa loo wado buuraha Calmadow. Ilkacase ayaa waxa kale oo uu qaabilsanaa isku xirka Alshabaabta waqooyi iyo kuwo koonfurta iyo fududeynta kuwa u tallaabaya buuraha Calmodow.
8 Nofeember 2012, maamulkii Madaxweyne Faroole waxa uu ku guulaystay in uu Ilkacase/ina Caloolgeel gacanta ku dhigo, markaas oo uu magaalada Gaalkacyo gacanta kula jiray fal argagixiso, watayna baabuur wada qaraxyo iyo jaakadaha ismiidaaminta. Waxaa isla markiiba loo dhaadhicyey xabsiga weyn ee argagixisada ee magaalada Garoowe, bilo kabacdina waxa ay Maxkamadda Ciidamada Qalabka Sida ku xaqiijisey danbiyadii uu ku eedaysnaa, waxaana lagu xukumay dil toogasho.
Xukun maxkamadeed oo ah dil toogasho kabacdi, waxaa magaalada Gaalkacyo lagu afduubay 2 arday, waxayna afduubayaasha ardaydu dalbadeen in la soo daayo Cabdirisaaq Tahliil ama ardada la layn doono. Madaxweyne Faroole waxa uu aad uga horyimid si cadna diidmo qayaxan u saaray madaxfurashada Ilkacase. Laakiin hadana Madaxweyne Faroole waxa uu in muddo ah dib-dhigay toogashadiisa.
8 Janaayo 2014, waxaa huggaanka Puntland la wareegay Madaxweyne Cabdiweli Cali Gaas. Hadana sidii Madaxweyne Faroole oo kale Madaxweyne Gaas wuxuu marar badan hakiyey dilka toogasho ee Cabdirisaaq Tahliil. Kudhawaad hal sano kabacdi, cadaadis ugu yimid odayaasha deegaanka Gaalkacyo iyo kuwa labada arday ee afduuban, Madaxweyne Gaas waxa uu 14 Diseenbar 2014, cafis u fidiyey Cabdirisaaq Xuseen Tahliil, loo yaqaan Ina Caloolgeel ama Ilkacase, oo markaas 24 bilood ama 2 sano xabsiga Garoowe ku ahaa toogasho suge xukunka Maxkamadda Ciidamada Qalabka Sida ee Puntland.
15 Diseenber 2014 Cabdirisaaq Xuseen Tahliil, Ina Caloolgeel (Ilkacase) ahna huggaanka hawlgalada iyo loojistikada Alshabaab Puntland iyo Gobolada Dhexe asaga oo haysta Cafis Madaxweyne Puntland waxaa laga siidaayey xabsiga argagixisada ee Garoowe, waxa uuna isla 15 Diseenbar si xor ah ku yimid, kuna dhexmaray magaalada Gaalkacyo.
21 Agoosto 2016, waxaa laba qarax oo waaweyn oo ismiidaamin ah lala beegtay xaruntii Dawladda Hoose ee Gaalkacyo iyo Cisbitaalka Guud ee Gaalkacyo. Qaraxaas waxa uu dhulka dhigay dhismayaashii dawladda oo cisbitaalku ku jiro, waxaana ku naf waayey dad 40 kor u dhaafay, dhaawucuna wuxuu ahaa kontomeeye.
28 Siteenbar 2016, ciidamada sida gaarka ah u tababaran ee PSF Gaalkacyo oo kaashanaya diyaaradaha aan duuliyaha lahayn ee Maraykanka waxay ka hortageen weerar iyo abaabul qarax oo laga waday duleedka koonfur Bari ee Gaalkacyo, meel u dhow deegaanka Jeexdin. Abaabulka weerarkaas dhicisoobay waxa ay ilo xogogaal ah sheegeen in ay lahaayeen Cabdirisaaq Tahliil (Ina Caloolgeel/Ilkacase) iyo Nuur Deeq Cabdullahi Maxamed Diini Maalinguur, waxaana ku basbeelay badanaa agabkii iyo dadkii hawlgalka argagaxa ah waday. Waqtigaas waxaa la soo wariyey in Cabdirisaaq Tahliil ku jiray rag ku dhaawacmay duqeynta PSF iyo Maraykanka oo iskaashanaya.
Sidii Cabdirisaaq Tahliil (Ina Caloolgeel/Ilkacase) looga siidaayey xabsiga weyn ee Garoowe waxaa bartii ka sii socda dilalka abaabulan ee lala beegsado haldoorka bulshada Gaalkacyo iyo masuuliyiinta Dowladda Puntland.
Sooqabashadii labaad ee uu mar kale soo galo gacanta Dowladda Puntland, dawladdu illaa iyo hadda kama aysan hadal sooqabashada iyo xarigga Cabdirisaaq Tahliil.
Diiwaanka wararka
Radio Daljir
COMMENTS