Ciidankii ugu dambeeyay ee Mareykan iyo Nato ayaa ka baxay saldhigga Bagram ee Afghanistan, oo ahaa xaruntii dagaalka lagula jiray mintidiinta muddo 20 sano.
Ka bixitaanka ayaa astaan u noqon karta in gabi ahaanba bixitaanka ciidamada shisheeye ee Afghanistan ay dhow dahay. Madaxweyne Joe Biden ayaa sheegay in ciidamada Mareykanka ay bixi doonaan ugu dambeyn 11-ka bisha September ee sanadkan.
Laakiin ka bixitaanka saldhiggan ballaaran ee waqooyiga Kabul ayaa ku soo beegmaya iyadoo kooxda jihaadiga ugu weyn Taalibaan, ay ku sii siqayaan qaybo badan oo Afghanistan ah.
Xilliga kama dambaysta ah ee 11 Sebtember waa sannad-guuradii ka soo wareegtay weeraradii lagu qaaday Ameerika 2001, oo ay ku dhinteen ku dhowaad 3,000 oo qof.
Weerarada waxaa fuliyay al-Qaacida, oo ah jabhad caalami ah oo jihaad doon ah oo markaa saldhigeedu ahaa Afghanistan iyadoo taageero ka heleysa Taalibaan, oo gacanta ku heysay wadanka ilaa 1990-yadii.
Balse Isbaheysi Mareykanku hogaaminayo ayaa duulaan ku qaaday Afghanistan dabayaaqadii sanadkaas si ay uga adkaadaan labada koox.
Mareykanku wuxuu hadda doonayaa inuu soo afjaro dagaalladiisii ugu dheeraa iyadoo ay ka soo gaartay qasaaro badan oo xagga ciidamada ah iyo kharash aad u fara badan, wuxuuna amniga uga tagayaa dowladda Afghanistan.
Tiro u dhexeysa 2,500-3,500 ciidamada Mareykanka ah ayaa loo maleynayaa inay weli ku sugan yihiin Afghanistan ilaa dhowaan markii ay bilaabeen inay baxaan, si kasta ha ahaatee in ka yar 1,000 askarta Mareykanka ah ayaa baaqi ku sii ahaan doonta.
Laga soo bilaabo bishii May ilaa 7,000 oo ciidamo kale oo isbahaysi ah ayaa ku sugnaa Afqaanistaan laakiin waxaa la rumeysan yahay in badankood ay hadda baxeen, iyadoo Jarmalka iyo Talyaanigu ay shaaciyeen bixitaankoodii Arbacadii.
Dhanka kale, Taalibaan oo soo laba kacleeysay ayaa waxa ay buux dhaafisay tobanaan degmo oo ay la wareegtay, iyadoo laga cabsi qabo in dagaal sokeeye cusub uu qarxo kadib bixitaanka ciidamada shisheeye.
Saldhigga ciidamada Bagram waa garoon diyaaradeed hore ugu ahaa Xarun ciidamada Midowga Soofiyeeti
Gegada diyaaraduhu waxay dhacdaa qiyaastii 40km (25 mayl) waqooyiga Kaabul waxaana loogu magac daray tuulo u dhow. Waxaa dhisay Ruushka markii Midowgii Soofiyeeti ee hore qabsaday Afgaanistaan 1980-yadii.
Xoogaggii isbahaysiga ee uu hoggaaminayay Maraykanka ayaa ballaariyey intii lagu guda jiray bishii Diseembar 2001, waxaana loo rogay saldhig weyn oo awood u leh inuu xajisto ilaa 10,000 oo askari.
Waxaa ku taal laba dhabaha diyaaraduhu ku ordaan oo kii ugu dambeeyay dheerarkiisu yahay 3.6km, halkaas oo ay ka soo degi karaan diyaarado waaweyn oo xamuul iyo kuwa wax duqeeya ah.
Waxay leedahay 110 goobood oo gawaarida la dhigto, waxaana ku yaal isbitaal 50-sariirood leh oo dhaawacyada lagu daweeyo, seddex tiyaatar oo qalliin lagu sameeyo iyo bukaan socod eegto ilko oo casri ah, sida ay ku warantay wakaaladda wararka ee Associated Press.
Dhismayaasheeda waxaa kujiray xabsiga weyn ee loogu tala galay dadka ay xiraan ciidamada mareykanka, taa oo loo yaqaanay Guantanamada Afgaanistaan .
COMMENTS