Maxaad Kala Socotaa Xaalka sii Xumaanaya ee Masar iyo Israa’iil iyo Xildhibaanka ku Hanjabay in ay Tel Aviv Maalin Gudaheed ku qaban doonaan haddii aysan Dhibka Joojin?
Waxaa isa soo taraya xiisadda u dhexeysa Masar iyo Israel tan iyo markii Madaxweynaha Mareykanku uu ku hanjabay in uu Falastiiniyiinta Gaza u barakicinayo dhankaas Masar iyo Urdun. Hadalkaas darti Madaxweyne Sisi oo ku casunaa Washington waa uu baajiyey safarkiisii, waxa uuna yiri, “uma socdo Washington inta Trump uu hadaladaas ku hadaaqayo.”
Maalmo kabacdi waxay Masar biloowday in ay ciidamadeeda heeggan sare galiso, hanjabaadana hawada u mariso Israa’iil. Maalmo kahor waxaa hadlay xildhibaan Mustafa Barky kuna hanjabay in ay Tel Aviv maalin gudaheed ku qaban doonaan haddii Israa’iil aysan joojin hanjabaadaha. Maalmo kahor siyaasiyiin iyo suxuufiyiin Israa’iil ayaa ku hanjabay in aan la sugan inta Masar ay dagaal soo qaadeyso ee hadda la duqeeyo biyoxireenka Aswan deedna biyo lagu harqiyo magaalooyinka Luxor iyo Aswan iyo dhammaan warshadaha iyo saldhigyada milatari ee ka agdhow (https://en.irna.ir/news/85751526/Egyptian-lawmaker-warns-Israel-of-consequences-for-threat).
Waa markii ugu horraysay tan iyo dagaalkii 6da maalmood 1973 oo Masar ay ciidamado lixaad leh heegan galiso, Israa’iil-na ay hanjabaado hawada u mariso.
Masar ayaa 4-ta Maarso qabaneysa shir dhaqaale loogu qoondeynayo dib-u-dhiska Gaza iyo dib-u-dajinta reer Gaza. Waa shir si walba uga soo horjeeda qorshihii Trump iyo Netanyahu ee Washington ee ahaa in Falastiiniyiinta laga barakiciyo deegaanka Gaza.
> Daljir Media
COMMENTS