Midowga Yurub ayaa u Muuqda mid Shacabka u Diyaargareynayaa Dagaal aan Shacabku Rabin, Ingiriiskuna sidoo Kale
Soomaalida iyo ganacsatada Soomaalidu diyaar ma u yihiin dagaal weyn oo dunida ka qarxa?
Dagaalkii koowaad iyo kii labaadna, labada dagaal kahor, dawladaha Yurub waxay shacabkooda u diyaariyeen dagaalo soo socda oo saameyn daran ku yeelan doonaa nolosha dadka, qof kasta. Dagaaladaas taariikhda cusub waxaa lagu fasiraa dagaalo ay ka danbeeyeen bangiyadu, ayna ahaayeen hanti boob. Haddii dagaal dhaco, sida taariikhda laga bartay, wixii hanti ah oo bangiyadu hayaan waxaa la wareega dawladda, nooc kasta, ha ahaato lacag, dahab ama kayd kasta oo qof ku aamini karo bangi.
Xaalka dhaqaale ee Yurub ama kan reer Galbeedka oo dhan ee maanta kama duwana kii dagaaladii hore oo kale, sidaas darteed waxaa maanta muuqda sansaan lamid ah kuwii hore. Sansaanta waxaa kamid ah lacagtii oo qiimo beeshay. Qiimihii badeecada oo kor u kacay. Xoriyadda qofka oo si yaraaneysa, qofkii awaamiirta dawladda kahoryimaadana xabsiga loola cararayo. Iyo tan ugu daran oo ah cadow cusub oo shacabka loo abuuro. Saddexda cadow ee hadda dadka reer Galbeedka si joogto loogu xuuxiyo waa Shiinaha, Ruushka iyo dadka Muslimiinta ah.
Ruushka iyo Shiinaha waxba looma qarin oo midna dagaal baa lagu qaaday, midna waaba loo sheegay in lagu soo socdo. Waxaa kuu soo haray Muslimiinta. Dhammaan dalalkii Muslimiinta aan ka ahayn Iran, Yemen iyo Gaza gacantaa lagu dhigay, wixii aan gacanta lagu dhiginna waxaa loo abuuray Takfiiriyiin argagixiso ah oo si toos ah u fuliya danaha reer Galbeedka. Yemen iyo Gaza warkoodu kuma seegana, intii Suuriya rajo ka qabteyna hadda waa rajobeel. Waxaa kuu soo haray Iran oo ah dalka kaliya ee Muslinka ee illaa iyo hadda loo gali la’yahay, laakiin tabaabushe dagaal weyn oo lagu qaadaa uu hadda xawli ku socdo.
Aan u soo laababo Yurub iyo wacyigalinta shacabka oo si toos ah hadda loogu sheegayo in ay dagaal u diyaargaroobaan, ayna diyaarsadaan agab iyo cunto haysa ugu yaraan 72 saac haddii dagaal degdeg ahi dhaco. Ingiriiska ayaa ugu dambeeyey oo maalmahaan asna bilaabay digniinta.
Muhiimadda qormadaan waa isweydiin in Soomaalida iyo ganacsatada Soomaalidu diyaar u yihiin dagaal weyn oo ka dhaca dunida. Marka laga tago diyaarinta raashin ku filan shacabka, waxaa khatar weyn ku jira lacagaha ganacsatada Soomaalida oo hadda sida la qiyaasayo in ka badan 80% lagu hayo bangiyada Jabuuti. Laakiin bangiyada Jabuuti waxay hoosyimaadaan bangiyada Faransiiska, oo ayana hoosyimaada Bank of England. Haddii dagaal dhaco dhammaan lacagaha ku jira bangiyada Yurub la fili mayo in ay soolaabasho leeyihiin, haddii la helana waa mar ay lacagtu qiima beeshay.
Haddaba maxaa maanta diyaar u ah ganacsatada Soomaaliyeed oo bangigoodu yahay Bank of England?
Nala qaybso fiiradaada iyo falceliskaagaba.
> Daljir Media
COMMENTS