20 July 2024, Markii ugu horreysay taariikhda siyaasadda Soomaaliya waxaa la arkay hal mar kaliya xildhibaanada ka soojeeda Koonfur Galbeed oo idil oo diiday inay ka qaybgalaan fadhigii Baarlamaanka.
Haddaba maxay tahay sababta keentay arrinkaas?
Sida aan ka warqabno hab-dhismeedka dowladnimo ee Soomaaliya wuxuu ku dhisanyahay awood-qaybsi beeleed, awood-qaybsiguna waxa uu u dhisanyahay sidaan:
GOLAHA BAARLAMAANKA:
1. Guddoomiye: DigilMirifle
Laba Guddoomiye Kuxigeen
2. Beesha Shanaad
3. Beesha Dir
AQALKA SARE:
1- Guddoomiye (Dir/Isaaq)
Laba Guddoomiye Kuxigeen
2. Beesha Daarood
3. Beesha Hawiye
GOLAHA FULINTA:
1. Madaxwayne (Hawiye)
2. Raysal Wasaare (Darood)
3. Raysal Wasaare Kuxigeen (Dir/Isaaq)
4. Raysal Wasaare Kuxigeenkii DigilMirifle hore u lahaan jireen oo meesha laga saaray
Doodda Xildhibaanada waxay leedahay, “Waa maxay sababta meesha looga saaray DigilMirifle?” Taasna micnaheedu soo ma aha inay gabi ahaanba ka maqanyihiin Golaha Fulinta (Executive Branch), halka golayaasha kale ee dowladnimo si siman loo wada qaybsaday.
HABDHISMEEDKA GOLAHA WASIIRADA:
- Beesha Darood 5 xubin
- Beesha Hawiye 5 xubin
- Beesha Dir 5 xubin
- Beesha Digilmirifle 5 xubin
- Iyo Beesha Shanaad oo ayana 5 xubin ah
Dooda labaad ee Xildhibaanada DigilMirifle waxay leedahay, “Wasaaradihii muhiimka ahaa waxaa lagu koobay oo kaliya Isaaq, Hawiye iyo Darood, oo DigilMirifle waxba kuma laha wasaaradahii muhiimka ahaa ee hore u lahaayeen.”
Doodda saddexaad Xildhibaanada DigilMirifle ayaa ayana ah tan ciidanka.
Hoggaanka afarta qaybood ee ciidanka waxaa lagu heshiiyey in lagu kala qaato afar beeloo, kala ahna Booliiska, Xoogga Dalka, Nabadsugidda iyo Asluubta. Laakiin taas ma dhicin oo maanta hoggaankii ciidanka waxaa isku koobay beelo gaar ah.
Beesha DigilMirifle waxay dareemayaan inay guud ahaan ka maqanyihiin Golaha Fulinta, wasaaradaha muhiimka, iyo taliska ciidamada, taasina waa mid baalmarsan heshiiskii awood-qaybsiga beelaha ee hore loogu soo heshiiyey.
Xasan Sheekh waa Madaxwaynahii ugu horreeyay ee booska ka saara xilkii Raysal Wasaare Kuxigeen ee beesha DigilMirifle; sidoo kale Maxamed Farmaajo wuxuu ku sii socday isla jidkii Xasan Sheekh oo asna waa uu u diiday beesha DigilMirifle inay helaan Raysal Wasaare Kuxigeenkii ay hore u haysteen, xaqna u lahaayeen xagga awood-qaybsiga beelaha.
Doodda Xildhibaanada DigilMirifle waa mid aaminsan in inta laga gudbayo 4.5 oo loo gudbayo nidaam kale in si siman wax loo qaybsado oo nidaamkii awood-qaybsiga beelaha ee ahaa 4.5 uusan noqon mid laga dhigo 2.5.
Haddaba, dhaqdhaqaaqa siyaasadeed ee ay wadaan Xildhibaanada DigilMirifle ma noqon doonaa mid ay ku guulaysan, mise wuxuu noqon mid ay ku qasaari doonaan? Waqtiga ayaa sheegi doono.
WQ: Sheiknor Abucar Qassim | X: https://x.com/SheiknorQassim
FAALLOOYIN & FALCELIN