PROF. XASAN KEYNAAN OO U DIGAY GUDDOOMIYAHA CUSUB EE MIDWOGA AFRIKA UNA SHEEGAY IN QOFKA UU YAHAY LAGA OGAAN DOONO MOWQIFKA UU KA QAATO ARGAGIXISADA ISIS EE KU SOO DUUSHAY PUNTLAND

Imtixaan adag ayaa sugaya hoggaamiyaha cusub ee Midowga Afrika Mudane Maxamuud Yuusuf, imtixaanka ugu horreeyana waa waxa uu ka yiraahdo ama uusan ka oran khataraha waaweyn ee aragagixisada ISIS ay ku hayso Afrika. ISIS waxa ay hadda dagaal adag oo jilbaha la isku aastay ka waddaa buuraha istiraatijiga ah ee Dawladda Puntland ee Soomaaliyeed.

Haddii Guddoomiyaha cusub ee Midowga Afrika uu ku guuldareysato in uu dhakhso wax uga yiraahdo ISIS oo aan waxba u jirin dalka laga soo doortay, go’aanka kaliya ee markaas laga qaadan karo waa in nabad, ammaan iyo barwaaqo ka hanaqaada Geeska Afrika, Afrika iyo dunida oo dhan aysan kamid ahayn qorshayaasha safka hore ugu jira oo mudnaanta u leh Mudane Yuusuf.

ISIS waxa ay khataro aan la sahlan karin ku haysaa dadyowga Afrika iyo dhaqaalahooda, laga soo billaabo Xeebta Atlaantiga ee Galbeedka Afrika iyo Saaxilka illaa iyo buuraha Puntland ee dusha sare kaga beegan Gacanka Cadmeed iyo Badweynta Hindiya. Waxay khataraha ISIS ku sii fidiyaan marinada istaraatijiga ah ee Badda Midhitareeniyaanka iyo Badda Cas illaa iyo Kaybka (Cape). Taliska Ciidamada Mareykanka ee saldhigga weyn ku leh dalka uu ka soojeedo Mudane Yuusuf ee Jabuuti ayaa ka digay cawaaqib-xumida ISIS oo si fiican u saldhigata buuraha istiraatijiga ah ee Puntland, taasna waxay dhalisay in Mareykanku uu abaabulo howlgalkii ugu horreeyey ee maamulka Madaxweyne Trump, uuna duqeeyo saldhigyada ISIS ee Buuraha Calmiskaad.

Maanta Afrikada aan rabno oo aan u hanqal-taageyno waxa ay noqoneysaa mid khiyaali ah ama nidaam khiyaano ku dhisan haddii hoggaamiyaha ururkii Midowga Afrika uu ka aamuso ama uusan dan ka yeelan meelaha maanta Afrika ugu dhimashada badan oo shayaadiin is urursatay ay dhan walba qaaradda uga soo socdaan. Aamusnaantu markaas waxay shayaadiintaas argagaxa wata u tahay hadiyad tii ugu fiicneyd ee la guddoonsiiyo.

Ugu dambeyn, dawladda Puntland hadda waa ku kali dagaalka argagixisada, taasina sax ma aha, waana caddaalad-darro. Sidoo kale waa mas’uuliyad-darro biirsatay anshax-xumi tii ugu liidatay. Kaagaba sii daran e, waa mid ka dhigeysa Ciidamada Nabad Ilaalinta Afrika ee AUSSOM iyo Xarunta Nabadda Afrika ee Midowga Yurub fuusto maran oo aan macno laheyn iyo maal-khasaaray.

WQ: Prof. Hassan Keynan | Maqaalka oo markii hore afka Ingiriiska ku qornaa waxaa rarjumay bahda Daljir