Ra’iisul Wasaare Rooble oo sheegay in Dowladda Soomaaliya ay ka go’an tahay Xaqiijinta qoondada Haweenka ee 30%

Ra’iisul Wasaaraha Xukuumadda Federaalka Soomaaliya Mudane Maxamed Xuseen Rooble oo kulan la qaatay haweenka labada Aqal ee Baarlamaanka Soomaaliya oo ay hoggaamineyso Wasiirka Haweenka iyo Horumarinta Xaquuqda Aadanaha ayaa sheegay in Dowladda Soomaaliya ay ka go’an tahay sidii loo Xaqiijin lahaa qoondada 30% ee Haweenku ay ku leeyihiin Golayaasha Qaranka.

Ra’iisul Wasaare Rooble ayaa ku ammaanay haweenka Soomaaliyeed kaalinta muuqata ee ay ku leeyihiin horumarinta bulshada, gaar ahaan xiliyadii adkaa iyo hadda oo dalku dib uga soo kabanayo.

Haweenka Soomaaliyeed oo qaba walaac ku addan lacagta isdiiwaan gelinta musharaxiinta u tartamaya kuraasta goleyaasha oo ka badan tii sanadkii hore ayuu Ra’iisul Wasaaruhu u caddeeyey in dadaal dheeri ah uu ku bixin doonno sidii arrintaa xal loogu heli lahaa.

Wasiirka Haweenka iyo Xaquuqul Insaanka Marwo Xaniifa Ibraahim Xaabsade ayaa tilmaamatay in haweenku ay helaan matalaad siyaasadeed oo muuqata ay tahay mid ka timid bulshada Soomaaliyeed dhexdeeda, iyadoo taas laga duulayana ay u howlgeli doonaan sidii loo xaqiijin lahaa kuraasta haweenka Soomaaliyeed ay ku leeyihiin Goleyaasha dowladda, waxayna uga mahadcelisay Ra’iisul Wasaaraha xaqiijinta qoondada haweenka.