Wafti uu hoggaaminayo Lavrov, Wasiirka Arrimaha Dibadda Ruushka, ayaa u ambabaxaya Sucuudiga si loogu gogol-xaaro shirka Riyaadh ee Madaxweyne Putin iyo Trump oo looga arrinsan doono dagaalka Ukraine iyo waliba arrimo kale oo waaweyn, sida Ruushka laga soo xigtay. “Ukraine waa mid kamid ah hawlaha waaweyn ee u baahan in Ruushka iyo Mareykanku meel isla dhigaan,” ayey hore u sheegtay Wasaaradda Arrimaha Dibadda Ruushka.
Marka laga tago dagaalka Ukraine oo ah mid Ruushku ku guuleystay, wixii uu rabana uu miiska kala tagi doono, waxaa jira siyaasado adag oo Ruushka iyo Mareykanku isku hayaan oo ay ugu horreeyaan joogitaanka ciidamada NATO ee xuduudaha Ruushka. Ruushku sida uu hore u sheegay waa in ciidamada NATO ay ka baxaan dhammaan xuduudaha Ruushka, siiba aagga Black Sea.
Ruushka ayaa u arka shirka Riyadh mid muhiimadiisa weyn aysan ahayn Ukraine ee ay tahay NATO.
Lavrov ayaa la filayaa in uu daqiiqadaha soo socda ka dego Riyaad.
Dhanka Mareykanka, waxaa Riyaad hadda soo gaaray Wasiirka Arrimaha Dibadda Marc Rubio, ninka Trump u qaabilsan arrimaha Bariga Dhexe Witkoff iyo Lataliyaha Ammaanka Waltz.
Yurub iyo Ukraine ayaan midkoodna miiska fadhiyin, una arka in loo tashanayo. Wararka qaar baaba waxay sheegayaan in Trump ku goodiyey in haddii Yurub isku deydo in ay natiijooyinka shirka qalalaase galiso uu Mareykanku ciidamadiisa kala bixi doono Yurub.
Shirka Riyadh ayaa la filayaa in uu Yurub xaalad cusub galiyo, madaxda Yurubna waxay ku goodinayaan in wax aysan raalli ka ahayn aan lagu khasbi karin.
Daljir kala soco wararkii ugu danbeeyey ee Shirka Riyaad.
> Daljir Media
COMMENTS