Shirka degdegga ah oo loogu magacdaray “Shirka Paris ee Ammaanka Europe (Paris Europe Security Summit)” waxaa qabanqaabiyey Madaxweynaha Faransiiska Macron, in kasta oo uu magaca Yurub shirku wato haddana waxaa kaliya oo lagu casumay 7 dal oo kala ah Faransiiska, Jarmalka, Ingiriiska, Talyaaniga, Poland, Spain iyo Denmark. Waa 7 dal oo safka hore uga jira in aan nabad ka dhalan Ukraine oo Ruushka laga saaro dhammaan deeganadii u qabsaday ee dadka jinsiyadoodu Ruush tahay ay degganyihiin. Dhammaan dalalkaas oo Ingiriiska, Jarmalka iyo Faransiisku safka hore yihiin ayaa sidii maamulkii tagay ee Biden ee Mareykanka aan qarsan in qorshahoodu yahay in la wiiqo Ruushka istaraatajiyad ahaan, oo dhowr dal loo kala jabiyo, kheyraadkiisana loo helo gacmo kale oo maamula.
Saas oo ay tahay qorshihii Mareykanka iyo Yurub waa fashilmay oo Ruushku wuxuu burburiyey, qaarna qabsaday badi wixii hub, lacag iyo ciidan ay NATO miiska u saartay Ukraine, illaa laga gaaro in la yiraahdo NATO maanta hub ku filan oo ay Ruush kula dagaalanto ma haysato.
Mareykanka oo maamul cusub la doortay waxa uu qiimeeyey in xaalku ku xunyahay, Ruushna aan loo babac dhigi karin, sidaas darteed Trump wuxuu door biday nabad iyo in lala heshiiyo Ruush. Laakiin todobada dal ee maanta shirku uga furmay Paris waa ka biyo-diideen soojeedinta Trump oo waxay la soo istaageen wax walba oo la heli karo aan Ukraine ku taageerno, cunoqabateyn horlehna aan Ruushka saarno. Mar kale Mareykanka waxa uu Yurub u sheegay in cunoqabateyntii Ruushka ay fashilantay, xoog iyo ciidan ahaana aan Ruush foodda la dari karin, marka nabad ha la raadsho.
Wasiirka Arrimaha Dibadda ee Hungry oo aan ku jirin dalalka Yurub ee shirka Paris lagu casumay, ahna dal aad ugu dadaalay in nabad la helo ayaa saacado kahor sheegay, “inta Paris isugu timid waa intii nabad-diidka ahayd, mana matalaan Yurub oo dhan.”
RW Ingiriiska Keir Starmer oo hadlay shirka kabacdi ayaa sheegay in Yurub ay taageerayso Ukraine, wax walba oo awoodeeda ah. Waxa uu ku sii daray in Ingiriisku ciidan diyaar la yahay haddii loo baahdo.
Waxaa kaloo hadlay RW Denmark oo ayana tiri waa in Ukraine loo oggolaado in ay duqeyso meel kasta oo Ruushka kamid ah, waana in lagu taageero wax allaale wixii miisaaniyad ay u baahanyihiin.
Todobada dal ee Paris ku shiraya ayaa dhammaantood dhaqaalahoodu aad u liitaa, ciidan ahaan iyo hub ahaana aad u wiiqmay. Ingiriiska oo lagu tirin jiray dalka ciidan ahaan ugu dhisan Yurub, waxaa hadda soo shaacbaxay in taangiyada u haray ay ka yaryiin 200, laba markab oo diyaaradaha dagaalka qaadaana aysan hal bil oo kaliya dagaal ku jiri karin. Ciidamada Ingiriiska ee hadda dagaal diyaar u ah ayaa iyana la sheegayaa in ay ka yaryihiin 50 kun. Waddamada kale ayaga warkoodaba daa.
Dhanka Riyaad, waxaa hadda yimid dhammaan wufuudii sare ee u sii gogol-xaareystay shirka Trump iyo Putin, waxaana la filayaa in shirkoodu uu bilaabmo berri oo Talaado (https://www.facebook.com/share/p/1FDwZAsh5d/).
Daljir kala soco wararkii ugu danbeeyey ee Yurub iyo waliba shirka Riyaad.
> Daljir Media
COMMENTS