Haddii Trump oo hore Yurub uga dhigay qoom aan siyaasadda adduunka ee maanta looga baahneyn, waxaa uga sii daray Madaxweyne Kuxigeen JD Vance asaga oo is kulul uga hadlay shirkii “Munich Security Conference.”
Waxa uu dhaleeco la dul istaagay Yurub oo dhan iyo waliba dal-dal, siiba Jarmalka. “Ruush iyo Shiinaad ku haysaan. Ruushka iyo Shiinuhu haba yaraatee wax khatar ah oo ay idin ku yihiin baan jirin. Khatarta ugu weyn ee maanta Yurub haysataa waa Yurub,” ayuu Vance si bareer ah ugu sheegay reer Yurub.
Wuxuu intaas ku sii daray, “Maxaa ku dhacay waxyaalihii qiimaha lahaa ee aad awal qadarin jirteen oo aan isku mowqif ka ahayn? Bal hadde fiiri dadkii shirkaan qabanqaabiyey waa ka reebeen dadka aan la mowqif ahayn, ha ahaadeen siyaasadda dhanka bidix ama midigta-fog. Doorashadii Romania musharraxii Yurub wadatay waa laga guulaystay, laakiin Yurub hawl cusub bay keentay oo waxay tiri ‘ma aqoonsanin ninkan la doortay’ oo markaas baad wixii oo dhan baabah ka dhigteen iyo waxbakamajiraan. Meeday dimoqoraadiyadii Yurub lagu ogaa? Xaggee laga keenay maxkamadaha Yurub baa doorashadii aysan rabin diidi kara? Haddana waxaad biloowdeen warbaahinta iyo xisbiyada aan idin ku fikir ahayn in aad tiraahdaan albaabadaan isugu dhufaneynaa. Sidani si ma aha, mana aha wixii Yurub laga filayey.”
Sidii loo sameeyey Midowga Yurub, dalalkii Yurub qaranimadoodii daleed waa lumiyeen oo waxaa la wareegay Brussels oo madaxda Yurub xukunta qof la doortay uusan ku jirin, awoodna u leh in ay dal walba oo Yurub u taliyaan, kana horyimaadaan kacdoon kasta oo shacab iyo qofkii la doorto oo aysan raalli ka ahayn.
Haddaan u wareegno dhanka Bariga Afrika, dadka diidan dawladda cusub ee loo sameynayo Afrikada Bari, caasumaduna tahay Caruusha, Tanzania, waxay ku doodaan in dawladda la yagleelayo ee East African Federation aysan waxba ka duwaneyn European Union, oo markaas Soomaaliya ay noqoneyso meel Caruusha looga taliyo, qofka Soomaaliga ahna iyo fikirkiisa aan dan laga lahayn.
Daljir kala soco siyaasadda xawaaraha ku socota ee adduunka iyo waliba tan Midowga Yurub oo hadda burbur qarka u saaran.
> Daljir Media
COMMENTS