Warar horudhac ah ayaa ka soo baxaya shirkii maanta ku soo xirmay Riyaad una dhexeeyey Ruushka iyo Mareykanka, ahaana kii ugu horreeyey sidii uu u biloowday dagaalka Ukraine.
In kasta oo uusan jirin wax la faafiyey weli, haddana warar hordhac oo Daljir helayso ayaa sheegaya in qodobada la isku afgartay ay kamid ahaayeen:
1. Shirku waxa uu muujiyey in labada dal isku soo dhawaadeen, ayna dhammaatay cadaawadii uu abuuray maamulkii hore ee Biden
2. Waxaa la isku afgartay in la magacaabo wufuud diyaariya kulan dhexmara Putin iyo Trump oo ay kala hoggaamin doonaan labada wasiir kuxigeen ee arrimaha dibadda
3. In laga fogaado wax kasta oo keeni kara colaad ka dhex abuuratan labada dal
4. Ruushku waxa uu miiska saaray in la qaado dhammaan wixii xayiraad la saaray, dhan dhaqaale iyo dhan dibloomaasiyeed, loona sooceliyo guryihii lagala wareegay ee safaaradda Ruushka iyo dibloomaasiyiintii la cayriyey
5. Arrimaha wadaxaajoodka Ukraine waa in la isla garto nidaam iyo tiim ka shaqeeya
Sida muuqataya shirka muhiimadiisu waxay ahayd in la isku muujiyo niyad wanaag, isu soo dhawaansho, dib-u-yagleel xiriirka labada dal, lana bilaabo wada xaajood tiim ka shaqeeya kulanka labada madaxweyne oo aan weli la shaacin goorta iyo meesha uu ka dhacayo.
Waxaa kale oo si dadban loo muujiyey in Yurub iyo Ukraine aysan qayb ka noqon doonin isu soo dhawaanshaha Ruushka iyo Mareykanka, taas oo la filayo in ay cirka ku sii shareeri doonto xiriirka Mareykanka iyo Yurub.
> Daljir Media
COMMENTS