Trump oo Jidkii Biden ku soo Noqday, soona Celiyey Dhammaan Taageeradii Ukraine, Hanjabaadana Hawada u Mariyey Ruushka
Trump oo sidii uu xukunka Mareykanka ula wareegay ku goodinayey in uu jarayo taageerada Ukraine, joojinayana dagaalka ayaa degdeg jidkii hore ee dagaalka ugu soo laabtay. Buuqii iyo sawaxankii Aqalka Cad ee dhexmaray Trump, Vance iyo Zelensky waxaad moodda in si hoose looga heshiiyey. Isbaddalka Mareykanka ayaa yimid kaddib kulankii Jeddah ee Zelensky iyo Wasiirka Arrimaha Dibadda Mareykanka Marco Rubio.
Haddaba maxaa lagu heshiiyey shirkii Jeddah ee Ukraine iyo Mareykanka? In kasta oo aysan weli soo bixin faahfaahinta rasmiga ah ee shirka, haddana Rubio oo la hadlay warbaahinta waxa uu sheegay, “Ukraine waa aqbashay xabbad-joojin, haddana kubbada waa dhanka Ruushka, waxaana kala ogaaneynaa in Ruushku rabo nabad iyo in kale.” Isla haddalkaas xalay illaa iyo saaka waxaa ku celinayey dhammaan madaxda Yurub.
Falaanqeeyayaasha dagaalka Ukraine ayaa hadalka Rubio iyo siyaasadda cusub ee Mareykanka u arka mid la rabo in dabin loogu dhigo Ruushka. Ruuskhu waxa uu mar hore meel kasta ka sheegay in uusan marnaba aqbali doonin xabbad-joojin macnaheedu yahay “Ukraine sii waqti ay ku neefsato, ciidan ku aruursato, hub cusubna u hesho.”
Markii Ruushku yiraahdo “xabbad-joojin maya,” waxaa la filayaa in Trump iyo Yurub oo wada socda ay hanjabaado horleh la beegtaan Ruushka, ayaga oo leh “Ruushku nabad ma rabo.”
Su’aal kale ayaa ah, maxay hanjabaadaha Trump laga filayaa ka badali karaan siyaasadda dagaalka Ukraine? Badi falaanqeeyayaasha dagaalka Ukraine ayaa isla qiraya in aysan waxba badali karin oo dhammaan wixii awood ah oo reer Galbeed hayey aysan waxba kala reebin oo wax kasta Ukraine siiyeen. Waxa kaliya oo dhimmana waa ayaga oo yiraahda dagaalka waa soo galaynaa, haddii taasi dhacdana hubka lagu dagaalami doonaa waa nukliyeer, wixii kalena markaas waa hadaltiro.
Trump oo warbaahinta shalay galab la hadlay ayaa asna ku goodiyey, “haddii Ruushku uusan xabbad-joojin oggolaan, waa wadaynaa taageerada, dad badanna waa dhimanayaan.”
Afhayeenka Wasaaradda Arrimaha Dibadda Ruushka oo hadashay ayaa sheegtay in Ruushku markasta diyaar u yahay in uu maqlo soojeedinta Mareykanka.
Maalmaha soo socda ayaa la filayaa in ay wada hadlaan Trump iyo Putin, sida wax u socdaana waxay u egtahay laba nin oo kala war la’. Meesha Trump xabbad-joojin ka hadlayo, Putin wuxuu wataa qorshe ah in NATO ka baxdo dhammaan dalalkii Bariga Yurub ee sidii Soofiyeetku u dhacay raacay NATO.
Sansaanta maalmaha soo socda ayaa u eg kuwo wata dhiilo colaadeed, Gaza, Suuriya, duullaanka loogu goodinayo Iran, illaa iyo Ruushka oo hadda hanjabaad horleh lala beeganayo.
> Daljir Media
COMMENTS