WAXAA SOO XIDHMAY SHIRKA CILMIBAARISTA URURKA JAAMACADAHA PUNTLAND

SHIRKA CILMI-BAARISTA URURKA JAAMACADAHA PUNTLAND 2025

WAR-MURTIYEED

Garoowe 06-05-2025,

Wasaaradda Waxbarashada iyo Tacliinta Sare ee Dowladda Puntland iyo Ururka Jaamacadaha Puntland ayaa magaalada Garoowe ku qabtay Shirka Cilmibaarista Ururka Jaamacadaha Puntland, 5-tii ilaa 6-da bishan Maajo 2025.

Shirka Cilmi-baarista Ururka Jaamacadaha Puntland oo ay ka soo qeyb-galeen Madaxweyne Kuxigeenka Dowladda Puntland Mudane Ilyaas Cismaan Lugatoor, Wasiirka Wasaaradda Waxbarashada iyo Tacliinta Sare ee Puntland Mudane Fu’aad Abshir Axmed, Gudoomiyaha Guddiga Arrimaha Bulshada ee Golaha Wakiilada Dowladda Puntand, Guddoomiyeyaasha Jaamacadaha iyo xarummaha waxbarashada, cilmi baarayaaal iyo khubarada Soomaaliyeed ee arrimaha waxbarashada.

Bahda Waxbarashada iyo khubrada arrimaha bulshada ayaa muddada uu socday shirku waxa ay yeesheen doodo miro-dhal ah oo ku saabsan horumarinta iyo dib u eegidda adeegyada waxbarashada, caafimaadka, tamarta iyo tiknaloojiyadda, adeegyada doowladaha hoose iyo maamul-daadejinta, si loo xaqiijiyo kobcinta adeegga bulshada.

Kaddib 17 cilmi baaris oo la soo bandhigay, 4 dood cilimiyeed iyo 5 soojeedin ay soo sameeyeen khubarada iyo cilmi-baareyaashu;

Shirka wuxuu soo jeedinayaa;

1. In la joogteeyo madashan, lagana dhigo mid sannadle ah , ayna wadajir u agaasimaan Wasaaradda waxbarashada iyo Tacliinta Sare ee Dawladda Puntland iyo Ururka Jaamacadaha APU.

2. In la xoojiyo midnimada, wadashaqaynta, iskaashiga iyo taageeridda tacliinta sare, si kor loogu qaado tayadda waxbarashada iyo cilmi-baarista.

3. In kor loo qaado cilmibaarista ku saabsan arrimaha bulshada, si xal loogu helo caqabadaha la xiriira adeeg bixinta aasaasiga ah.

4. In la dardargaliyo adeegyada waxbarshada ee aasaasiga ah, lana maalgaliyo iyadoo la adeegsanayo hannaanka casriga ah.

5. In tiknoolojiyadda casriga ah looga faa’iideysto arrimaha waxbarashada, lana xoojiyo farsamada gacanta iyo xirfadaha, taas oo xal u ah caqabadaha shaqo la’aanta.

Shirku waxa uu u mahadcelinayaa madaxda Dowladda Puntland, gaar ahaan Wasaaradda Waxbarashada iyo Tacliinta Sare doorkii ay ka qaateen taabba-galka Shirka Cilmi-baarista Ururka Jaamacadaha Puntland oo ah kii ugu horreeyey ee ku qabsooma Puntland.
Sidoo kale, shirku waxa uu u mahadcelinayaa maalgaliyaasha shirka oo ay ugu horreeyaan shirkadaha iyo hay’adaha maxalliga ah.

Mahadsanidiin