Xeer Ilaaliyaha Guud ee Qaranka: “Xaalufinta deegaanka iyo dhoofinta dhuxushu waa musiibo Qaran

War-saxaafadeed ka soo baxay xafiiska Xeer Ilaalinta Guud ee Qaranka Dr Sulaymaan Maxamed Maxamuud ayaa looga hadlay kiisas ku aadan xaalufinta dhirta iyo daabulida dadka sida sharci darada ah loo dhoofiyo

War-saxaafadeedka ayaa lagu sheegay in Xafiiska Xeer Ilaaliyaha Guud ee Qaranka uu gacanta ku hayo baaritaanno loogu raad joogo ganacsiyo ku leg leh xaalufinta deegaanka, dhoofinta dhuxusha iyo daabulka iyo ka ganacsiga dadka.

Dhammaan laamaha baarista Booliiska, Xafiiska Xeer Ilaaliyaha Guud ee Qaranka iyo hay’adaha dalka ee doorka ku leh ayaa qayb ka ah baaritaannada dembiyadaan ka dhanka ah dadka iyo deegaanka Soomaaliyeed.

Dadaalladaan ayaa qeyb ka ah tallaabooyin lagu sugaayo badqabka shacabka iyo bay’adda lagulana dagaalamaayo dembiyada noocyadooda kala duwan.

Xafiiska Xeer Ilaaliyaha Guud ee Qaranka ayaa baaqay shacabka Soomaaliyeed in ay la shaqeeyaan hay’adaha baarista dalka si looga hortago dembiyada liddiga ku ah jiritaan keenna.

Diwaanka wararka
Radio Daljir