24-kii bishii aynu soo dhaafnay ee Feebaraayo magaalada Gaalkacyo waxaa ka dhacay fal aad u foolxun oo abuuray amakaag iyo anfariir bulsho, kaddib markii kufsi wadareed iyo dil naf goyn ah loo geystay gabar yar oo carruur ah, da’deeduna ahayd 12 jir, taasoo lagu magacaabi jiray Caasho Ilyaas Aadan.
Meel aan ka fogayn gurigooda oo Gaalkacyo ku yaalla ayaa xilli subax ah laga kaxaystay, waxaana la helay 24 saac kaddib iyadoo meyd ah, ayna ka muuqdaan haaro-nabareed iyo falxumooyin kale oo la aaminsanyahay in ay yihiin kuwa sababay dhimashadeeda.
Caa’isha Ilyaas falka gurracan ee loo geystay waxaa loo qabtay dhawr qof oo la aaminsanyahay in ay yihiin kuwii ku luglahaa dilkeeda iyo dambigeeda kufsi ee sida wadareed u dhacay, hase ahaatee weli ma jirto wax xog ah oo dawladda iyo laamaheeda dambi-baaristu ka soo bandhigeen dhacdaasi.
Ilyaas Aadan Maxamed waa aabbaha dhalay Caa’isha, wareysi gaar ah oo uu siiyey Radio Daljir ayuu ka hadlay arrimo badan oo la xiriir dhacdaasi, waxaana uu sheegay dawladda in ay u xaqiijisay kiiskaasi in loo hayo afar qof, laguna helay caddaymo ku filan.
Ilyaas Aadan waxaa kale oo uu Daljir u sheegay falka dilka iyo kufsiga iskugu jira ee loo geystay gabadhiisa marna in uusan waanwaan iyo wadahal toona ka galaynin, balse uu ku qanci karo oo kaliya caddaaladda iyo shareecada islaamka.
Cabdifataax Cumar Geeddi oo wareystay Ilyaas Aadan, aabaha Caa’isha, wuxuu marka hore waydiiyey xogta ehel ahaan ay hayaan, kuna aaddan falkaasi iyo cidda lo ohayo.
Hoos kaga bogo.
FAALLOOYIN & FALCELIN